०८ असार २०८३, सोमबार
काठमाडौं २५ पुस– डा गोविन्द केसीले सर्वोच्च अदालतका प्रधानन्यायाधीश गोपाल पराजुलीमाथि छानविनको माग गरेका छन् । न्यायाधीश ओमप्रकाश मिश्र र केदार चालिसेको इजलासमा मंगलवार बयान दिदै डा केसीले प्रधानन्यायाधीश माथि छानविनको माग गरेका हुन् ।
बयानका क्रममा डा केसीले अदालतप्रति आपनो निष्ठा रहेको र अदालतको अपमान नगरेको दावी गरे । प्रधानन्यायाधीश पराजुलीका गलत निर्णय र कार्यहरुले नै न्यायापालीकाको मानमर्दन गरेको बयानका क्रममा केसीले बताए । केसीले प्रधानन्यायाधीश पराजुलीले राजिनामा दिनु पर्ने माग गरे ।
डा केसीले सर्वोच्चका रजिस्ट्रार नहकुल सुवेदीलाई ६ महिनाको अन्तरालमा तीनपटक बढुवा गरेर प्रधानन्यायाधीश पराजुलीले पदीय दूरुपयोग गरेको समेत बताएका थिए ।
डा केसीले प्रधानन्यायाधीश पराजुलीविरुद्ध दिएको अभिव्यक्तिबारे इजलासमै बयान भएको हो । १४ औ अनसन शुरु गर्ने क्रममा डा केसीले प्रधानन्यायाधीश पराजुलीविरुद्ध अभिव्यक्ति दिएको भन्दै सर्वोच्च अदालतका शाखा अधिकृत नेत्रबन्धु अर्यालले सोमवार अबहेलना मुद्दा दायर गरेका थिए ।
सोमवार नै सर्वोच्च अदालतले केसीलाई बयानका लागि मंगलवार ९ बजे सर्वोच्चमा उपस्थित गराउन आदेश दिएको थियो । सोमवार अनसन स्थलबाटै पक्राउ परेका डा केसीलाई बयानका लागि बिहान ९ बजे अगावै सर्वोच्च अदालत पुराइएको थियो ।
अदालत पुराइएको ५ घण्टापछि दिउसो २ बजेदेखि डा केसीको बयान शुरु भएको हो ।
