फिफा विश्वकप २०२६ को अन्तिम १६ अन्तर्गत फिलाडेल्फिया स्टेडियममा भइरहेको भिडन्तमा दक्षिण अमेरिकी राष्ट्र पाराग्वेले विश्वविजेता फ्रान्सलाई कडा चुनौती दिइरहेको छ।

 ३८ डिग्री सेल्सियसको अत्यधिक गर्मीका बीच खेलिएको प्रतिस्पर्धाको पहिलो हाफ गोलरहित बराबरीमा सकिएको छ।

खेलको सुरुदेखि नै फ्रान्सले बलमाथि नियन्त्रण जमाए पनि पाराग्वेको संगठित र अनुशासित रक्षापंक्ति तोड्न उनीहरूलाई निकै हम्मेहम्मे परेको छ। दुवै टोलीका तर्फबाट गोलपोस्टमा एउटै पनि 'सट अन टार्गेट' प्रहार हुन सकेन। सन् १९६६ पछिको विश्वकप इतिहासमा नकआउट चरणको खेलमा पहिलो हाफमा कुनै पनि सट अन टार्गेट नभएको यो केवल तेस्रो अवसर हो।

खेलका क्रममा फ्रान्सेली स्टार केलियन एमबाप्पे र ओसमान डेम्बेलेले केही प्रयास गरे पनि पाराग्वेका रक्षक जुआन जोसे कासेरेस र गोलकिपर ओर्लान्डो गिलले ती प्रयासहरूलाई असफल तुल्याइदिए। 

यस खेलको विजेताले क्वार्टरफाइनलमा मोरक्कोको सामना गर्नेछ।