२९ जेठ २०८३, शुक्रबार
काठमाडौं १० फागुन–नेपाली कांग्रेस संसदीय दलको बैठक १२ गते शनिवार बस्ने भएको छ । कांग्रेस प्रवक्ता विश्वप्रकाश शर्माले प्रतिनिधिसभा र राष्ट्रियसभामा प्रतिनिधित्व गर्ने सांसदहरुको पहिलो संयुक्त बैठक बस्न लागेको जानकारी दिए ।
संसदीय दलको कार्यालय सिंहदरबारमा १२ गते बिहान ९ बजे बस्ने बैठकमा संसदीय दलको नेता चयनको बिषयमा छलफल हुनेछ । संसदीय दलको नेताका लागि सभापति शेरबहादुर देउवा, महामन्त्री शशांक कोइराला र पूर्वमहामन्त्री प्रकाशमान सिंहले दावी पेश गरेका छन् ।
संस्थापन पक्षले देउवालाई नै संसदीय दलको नेता बनाउने रणनीति बनाएको छ । वरिष्ठ नेता रामचन्द्र पौडेल पक्षधरले भने महामन्त्री शशांक कोइरालाको नाम अगाडी सारेको छ ।
पौडेल पक्षका नेता सिंहले पनि दलको नेताका लागि दावी गरेका छन् । कांग्रेसमा नेतृत्व हस्तान्त्ररणका लागि बहस शुरु गरेका युवा नेताहरुले देउवाले संसदीय दलको नेता दावी गर्न नमिल्ने बताउँदै आएका छन् ।
चुनावमा पार्टी पराजयको जिम्मा लिदै देउवाले सभापतिबाट समेत राजीनामा गर्नुपर्ने सो समूहको माग छ । प्रतिनिधि सभामा प्रमुख प्रतिपक्षी दलको नेताको हैसियतमा सक्रिय भूमिका खेल्नु पर्ने भएकोले देउवालाई सो पद दिन नहुने युवा नेताहरुको भनाइ छ ।
संस्थापन पक्ष भने जसरी भएपनि दलको नेता देउवालाई वनाउने रणनीतिमा लागेका छन् । सहमतिको सम्भावना क्षीण रहेकोले दलको नेता छान्न मतदान हुने सम्भावना रहेको कांग्रेस स्रोत बताउँछ ।
पौडेल समूहमा पनि शशांक कि प्रकाशमान भन्नेमा विबाद छ । महामन्त्री भएकोले आफू स्वतह दलको नेताको दावेदार रहेको शशांकको भनाइ छ ।
दलको नेता भएमा आशन्न पार्टी महाधिवेशनमा पार्टी सभापति लड्ने शशांकको योजना छ ।
