३१ जेठ २०८३, आइतबार
काठमाडौं, ११ फागुन– इंग्लिस क्लब आर्सनल युरोपा लिग फुटबलको अर्को चरणमा प्रवेश गरेको छ । गएरातिको खेलमा पराजित भए पनि एग्रिगेट स्कोरमा ४–२ ले विजयी हुँदै आर्सनल अर्को चरणमा प्रवेश गरेको हो ।
गएराति भएको दोस्रो चरणको खेलमा आफ्नै मैदानमा स्विडेनको ओएफकेसँग २–१ ले पराजित भए पनि पहिलो लेगमा हात पारेको ३–० को जितको मद्दतले आर्सनल अर्को चरणमा उक्लिएको हो ।
युरोपा लिगअन्तर्गत गएराति भएका अन्य खेलमा ईटालीको लाजियोले रोमानियाको स्टावा बुकारेष्टलाई ५–१ ले हराउँदा स्पेनको एथ्लेटिको मड्रिडले डेनमार्कको एफसी कोपनहेगनलाई १–० ले पराजित गर्यो ।
गएराति नै भएका अन्य खेलमा फ्रान्सको लियोंले स्पेनको भियारियालमाथि १–० को जित निकाल्यो । यस्तै ईटालीको नापोलीले जर्मनीको आरबी लेप्जीगलाई उसैको मैदानमा २–० ले पराजित गरेको छ ।
रुसको जेनिथले स्कटल्याण्डको सेल्टीकलाई ३–० ले स्तब्ध पार्दा ईटालीको एसी मिलानले बुल्गेरियाको लुदोगोरेट्स रज्गार्डलाई १–० ले, रुसको स्पार्टा मस्कोले स्पेनको एथ्लेटिक बिल्बाओलाई २–१ ले, पोर्चुगलको ब्रागाले फ्रान्सको मार्सेलाई १–० ले तथा अष्ट्रियाको साल्जबर्गले स्पेनको रियाल सोसीडाडलाई २–१ ले हराएका छन् ।
