२१ असार २०८३, आइतबार
सिन्धुली, ११ फागुन– नेपाली कांग्रेसका नेता प्रकाशमान सिंहले पार्टी सभापति शेरबहादुर देउवाले जिम्मेवारी राम्रोसँग बहन गर्न नसकेको आरोप लगाएका छन् । नेपाली कांग्रेस सिन्धुली र नेपाल प्रेस युनियनले शुक्रबार आयोजना गरेका कार्यक्रमलाई सम्बोधन गर्दै नेता सिंहले देउवा सबैको सभापति बन्न नसकेको बताए ।
देउवा गुटको मात्रै सभापति भएको उनको भनाई छ । उनले प्रश्न गरे, ‘तरुण दल, महिला संघ, नेविसंघ कहाँ छ कहाँ ?’ नेता सिंहले भने, ‘उहाँले जिम्मेवारीअनुसार काम गर्न सक्नु भएन । दुई वर्षसम्म कांग्रेसलाई गतिशील बनाउन नसक्दा निर्वाचनमा हार्नुपरेको छ । जिल्लाहरूमा प्रशिक्षणको माग छ । त्यति सानो काम पनि सभापतिले गराउन सक्नु भएन ।’
आफूले कांग्रेसलाई सुधार्न दबाव दिइरहेको भन्दै उनले कांग्रेस अझै पनि नसुध्रिए सबैको भविष्य संकटमा पर्ने खतरा औंल्याए । ‘कांग्रेस राम्रो भयो भने सबैको भविष्य राम्रो हुन्छ । पार्टीको भविष्य भएन भने हाम्रो पनि भविष्य रहँदैन’, कांग्रेस पूर्वमहामन्त्री सिंहले भने, ‘कांग्रेसलाई जोगाउन लाग्नुपर्छ ।’
