काठमाडौं, २६ फागुन-आईसीसी विश्वकप क्रिकेट छनोट प्रतियोगिताअन्तर्गत अफगानिस्तानविरुद्धको खेलमा पनि कप्तान पारस खड्काले अर्धशतक प्रहार गरेका छन् ।

विश्व नम्बर १ बलर रसिद खानलाई उनको स्पेलको दोस्रो बलमा चौका प्रहार गर्दै पारसले ५० रनको आंकडा पार गरे । यसका लागि ५६ बल खर्चिएका पारसले ७ चौका र १ छक्का हिर्काए ।

यसअघि स्कटल्याण्डविरुद्धको खेलमा पनि पारसले ६३ रनको पारी खेलेका थिए ।

टस जितेर पहिले ब्याटिङ गरेको नेपालले यो समाचार तयार पार्दासम्म २२ ओभरको समाप्तिमा १ विकेट गुमाएर ८७ रन जोडेको छ । कप्तान पारससँगै उपकप्तान ज्ञानेन्द्र मल्ल क्रिजमा छन् ।

शुरुवाती २ खेलमा पराजय भोगेको नेपाल सुपरसिक्समा स्थान बनाउन आजको खेल जित्नै पर्ने दबाबमा छ । प्रतियोगितामा अप्रत्यासितरूपमा कमजोर प्रदर्शन गरेको अफगानिस्तानले पनि अहिलेसम्म अंक जोड्न सकेको छैन ।

नेपाल रहेको 'समूह बी'बाट स्कटल्याण्डले सुपरसिक्समा स्थान पक्का गरिसकेको छ । बाँकी २ स्थानमा जिम्बाब्वे, नेपाल, हङकङ र अफगानिस्तान सबैको सम्भावना जीवित छ । जिम्बाब्वेले २ खेल जितिसकेको अवस्थामा उसको सम्भावना सबैभन्दा बढी छ । हङकङले पनि १ खेल जितेको छ ।

प्रतियोगिताबाट नेपालले आगामी ४ वर्षका लागि एकदिवसीय मान्यता पक्का गर्ने लक्ष्य राखेको छ । त्यसका लागि आजको खेलमा अफगानिस्तान र सोमबार हङकङलाई हराउनुपर्ने हुन्छ ।

अन्यथा एकदिवसीय मान्यता पाउने सम्भावना क्षिण बन्नेछ ।