२० असार २०८३, शनिबार
काठमाडौं, २८ फागुन– आईसिसी विश्वकप क्रिकेट छनोटअन्तर्गत नेपालले आज हङकङसँग खेल्दै छ । यसअघिका तीन खेलमा पराजित भएको नेपाल आजको खेल जित्नै पर्ने दबाबमा छ ।
जिम्बावेमा जारी प्रतियोगिताअन्तर्गत समूह ‘बी’ को अन्तिम खेलमा नेपालले हङकङसँग खेल्न लागेको हो । शुरुवाती तीन खेलमा जिम्बाबे, स्कटल्याण्ड र अफ्गानिस्तानसँग हारेको नेपाल आज पहिलो जितको खोजीमा मैदानमा उत्रदै छ ।
तेस्रो खेलमा पनि पराजित भएपछि नेपालको सुपर सिक्समा पुग्ने सम्भावना निकै कमजोर बनेको छ । सम्भावना अब अंक गणितमा मात्र सीमित छ । अझै ठूलो खतरा त के देखिएको छ भने समूहको अन्तिम खेलमा हङकङलाई पराजित गर्न नसके नेपाल प्लेअफअगावै ’डिभिजन टू’मा घटुवा हुने खतरा छ ।
समूहमा लगातार तीन खेल हारेको नेपालले सुपर सिक्समा पुग्ने सम्भावना बाँकी राख्न आज हङकङलाई फराकिलो अन्तरले हराउनुपर्छ । तर झिनो अन्तरमै हङकङलाई हराएको खण्डमा पनि नेपालको एकदिवसीय मान्यता पाउने सम्भावना भने बाँकी नै रहन्छ ।
त्यसका लागि समूह ए को खेलमा पनि भर पर्नुपर्ने हुन्छ । एसोसिएट राष्ट्रहरु स्कटल्याण्डजस्तै समूह ए बाट युएई र बी बाट हङकङले सुपरसिक्समा स्थान बनाए नेपालको एक दिवसीय मान्यता पाउने बाटो सकिनेछ ।
