महेन्द्रनगर, २२ चैत– कञ्चनपुरको भीमदत्त नगरपालिका–१२ ऐरीमा अन्त्येष्टि घाट बनाउने प्रक्रिया शुरु गरिएको छ । महाकाली नदीको ऐरीघाट निर्माण हुने अन्त्येष्टि घाटका लागि ठेक्का आव्हान गरिएको छ  । 

सहरी विकास तथा भवन निर्माण विभाग डिभिजन कार्यालय धनगढीले अन्त्येष्टि घाट निर्माणका लागि चार करोड ५० लाखको ठेक्का आव्हान गरेको छ ।

भीमदत्त नगरपालिकाका नगर प्रमुख सुरेन्द्र विष्टले डिभिजन कार्यालयले ठेक्का आव्हान गरी अन्त्येष्टि घाट निर्माणको प्रक्रिया शुरु गरिएको बताए । ‘यो लामो समयदेखि माग हुँदै आएको एजेण्डा हो, अहिले टेण्डर भएको छ, अब सम्झौता गरी अघि बढ्छ,’ नगर प्रमुख विष्टले भने ।

तीन वर्षसम्म सञ्चालन हुने सघन सहरी विकास कार्यक्रम अन्र्तगतका महाकाली नदीमा अन्त्येष्टि घाट निर्माण पहिलो नम्बरमा राखिएको छ । यस बाहेक कार्यक्रम अन्तर्गत विभिन्न वडामा सडक कालोपत्रेका योजना छन् । 

भीमदत्त नगरपालिकाको सहरी विकास शाखाका इन्जिनियर गोरख बहादुर सिंहले गुरुयोजना बनाएर अन्तेष्टि घाट निर्माणका लागि ठेक्का गरिएको बताए ।

‘अन्त्येष्टि घाट कस्तो बनाउने भन्ने गुरु योजना तयार गरी टेण्डर गरिएको छ,’ उनले भने, ‘अब योजान अनुसार घाट निर्माण कार्य शुरु हुन्छ ।’

चारैतिर पर्खाल हुने घाटमा खुला र टिनका छाना भएका चार/चार घर हुने गुरु योजनामा उल्लेख गरिएको छ । यसैगरी हरियाली, आवतजावत गर्ने बाटो, नदी रोक्न पर्खाल लगायतका संरचना निर्माण गर्ने योजना छ ।

महाकाली परमधाम शान्ति घाट जिल्ला समितिका अध्यक्ष तारादत्त जोशीले घाट निर्माणको सपना पूरा हुन लागेको बताए । ‘महाकाली नदीमा घाट निर्माणका लागि वर्षौदेखि माग गर्दै आएका छौं,’ उनले भने, ‘यस पटक बल्ल पूरा हुने भयो । यसले खुसी छौ, योजना अनुसार राम्रो घाट बनोस् ।’

समितिले घाट निर्माणका लागि नगरपालिकालाई दबाव दिन तीन वर्ष अघि कुशको शव बनाएर नगरपालिका कार्यालयको कोठामा राखेका थियो । घाट निर्माण प्रक्रिया
शुरु गरिएपछि शव जलाउने तयारी गरिएको छ । ‘घाट निर्माणका लागि शव राखेका थियौ, अब प्रक्रिया शुुरु भएकाले जलाउँछौ,’ उनले भने ।

भारतीय सीमा सुरक्षा बल एसएसबीले शारदा ब्यारेज नजिक नदीमा दाहसंस्कारमा अवरोध गर्न थालेपछि जोशी लगायतले घाट निर्माणका लागि अभियान चलाएका थिए । 

२०६७ मा महाकाली परमधाम शान्ति घाट निर्माण समिति गठन गरिएको थियो । यसैबीच ऐरी घाटमा घाट निर्माण प्रक्रिया शुरु गरिएपछि तीन वर्षदेखि नगरपालिकाको कोठामा राखिएको कुशको शवको दाहसंस्कार गरिने भएको छ ।

महाकाली परमधाम शान्ति समितिले बुधबार महाकाली नदीमा शव जलाउन लागेको छ । अन्त्येष्टि घाट नभएसम्म शव नलजाउने माग सहित तीन वर्ष अघि कार्यालयको कोठामा राखिएको थियो । समितिका अध्यक्ष जोशी सहितले कपाल मुन्डन गरी शवलाई कोठामा राखेका थिए ।

समितिका अध्यक्ष जोशीले अन्त्येष्टि घाट निर्माणको प्रक्रिया शुरु गरिएकाले बुधबार शवको दाहसंस्कार गरिने बताए । ‘माग पूरा हुन लागेको छ, मेयर सापले पनि शव जलाउन आग्रह गर्नु भयो,’ उनले भने, ‘त्यसै अनुसार भोलि (बुधबार) शवको शव यात्रा गरी महाकालीमा अन्त्येष्टि गर्नेछौ ।’