०७ साउन २०८३, बिहीबार
धनगढी, ३० चैत– बोल्ने समयमा विभेद गरेको भन्दै प्रदेश नं. ७ का महिला सांसदहरुले असन्तुष्टि जनाएका छन् ।
संसदमा प्रस्तुत भएको नीति तथा कार्यक्रमबारे धारणा राख्ने क्रममा पुरुष सांसदको तुलनामा कम समय दिएको भन्दै महिला सांसदहरुले असन्तुष्टि व्यक्त गरेका हुन् । प्रदेश प्रमुख मोहनराज मल्लले चैत २८ गते संसदमा नीति तथा कार्यक्रम प्रस्तुत गरेयता सांसदहरुले धारणा राखिरहेका छन् ।
संसदमा धारणा राख्ने महिला सांसदहरुले दलभित्रै विभेद भएको पनि गुनासो गरे । नेकपा एमालेकी सांसद पूर्णा जोशीले आफूहरुले दावी गरेको समय कटौती गरेर बोल्ने समय दिएको बताइन् । उनले आफु १० मिनेट समय मागेपनि ८ मिनेट मात्रै बोल्न दिएको तर सहकर्मी पुरुष सांसदहरुलाई भने बढी दिएको उनको गुनासो छ ।
संसद सचिवालयका अनुसार संसदको कार्य व्यवस्था परामर्श समितिले ५ घण्टा चल्ने संसद बैठकलाई बिहीबार ३ घण्टा र शुक्रबार २ घण्टासम्म चलाउने निर्णय गरेको थियो । जुन समयलाई राजनीतिक दलको सिट संख्याको आधारमा समय विभाजन गरिएको संसद सचिवालयका साचिव बालराम शर्माले जानकारी दिए ।
सचिव शर्माको अनुसार ५ घण्टाको अवधिमा नेकपा एमालेलाई १४० मिनेट, नेकपा (माओवादी केन्द्र)लाई ८० मिनेट, नेपाली काँग्रेसलाई ७० मिनेट र राजपालाई १५ मिनेट बोल्ने समय विभाजन गरिएको थियो । पार्टी भित्र कुन सांसदले कति बोल्ने भन्नेबारे पार्टीको सचेतकमा भर पर्ने उनको भनाइ छ ।
सांसदहरुले खर्चेको समय
बिहीवार बसेको संसद बैठकमा सांसद अर्चना गहतराज ५ मिनेट, अमर बहादुर साउँद १० मिनेट, उमा बादी ५ मिनेट, कर्ण मल्ल १० मिनेट, कुन्ती जोशी ५ मिनेट, नन्द कुमारी बम ५ मिनेट, कुलबीर चौधरी १० मिनेट, कृष्णबहादुर चौधरी ६ मिनेट, चुनकुमारी चौधरी ८ मिनेट, टेक बहादुर रैका आउजी ५ मिनेट, डिल्लीराज पन्त ५ मिनेट, दिव्येश्वरी शाह ५ मिनेट, दुर्गा कुमारी कामी ७ मिनेट, देवकी मल्ल थापा ५ मिनेट, देवराज पाठक ५ मिनेट, नन्द बहादुर साँउद ६ मिनेट, नेपालु चौधरी १० मिनेट, पुर्णा जोशीले ८ मिनेट बोल्ने समय पाएका थिए ।
त्यस्तै, शुक्रबार चलेको बैठकमा मान कुमारी साँउद ८ मिनेट, महेश दत्त जोशी १२ मिनेट, मानबहादुर धामी १२ मिनेट, मानबहादुर सुनार ५ मिनेट, कृष्णराज सुबेदी १० मिनेट, माया तमाङ ५ मिनेट, मालामति राना ६ मिनेट, रतन थापा १० मिनेट, लालबहादुर खड्का १० मिनेट, वीरमान चौधरी १५ मिनेट, शान्ति नेपाली ५ मिनेट, श्यामलाल थारु ५ मिनेट, सुशिला बुढाथोकी ८ मिनेट र हर्क बहादुर कुँवरले १० मिनेट बोल्ने समय पाएका थिए ।
