काठमाडौं, १५ वैशाख– डिएगो म्याराडोनाले अल फुजाइराह क्लबको प्रशिक्ष पदबाट राजीनामा दिएका छन् । अर्जेन्टिनाका पूर्व खेलाडी तथा विश्वकप विजेता ५७ वर्षे म्याराडोना गएको मेदेखि क्लबको प्रशिक्षक थिए । 

युएईमा म्याराडोनाको यो प्रशिक्षकका रुपमा दोस्रो कार्यकाल हो । यसअघि उनले अल वास्ल क्लबमा प्रशिक्षकको भूमिका निभाएका थिए । उनले अर्जेन्टिनाको राष्ट्रिय टिममा सन् २००८ देखि २०१० सम्म प्रशिक्षकको भूमिका निभाएका थिए ।

अल फुजाइराह क्लब संयुक्त अरब इमिरेट्सको दोस्रो डिभिजनबाट सीधै शीर्ष डिभिजिनमा उक्लिन असफल भएपछि अर्जेन्टिनी म्याराडोनाले राजीनामा दिएका हुन् । शुक्रबार भएको खोर्फाक्कान क्लबसँगको खेलमा १–१ को बराबरीमा रोकिएपछि म्याराडोनाको टिम दोस्रो डिभिजनको शीर्ष दुईमा पर्ने सम्भावना सकियो ।