३१ जेठ २०८३, आइतबार
काठमाडौं, २५ वैशाख– प्रहरी सक्रियताले केही समयदेखि कम भएको भनिएको अवैध अन्तर्राष्ट्रिय कल बाइपास गर्ने क्रम फेरि बढेको छ ।
काठमाडौंका होटेलमै बसेर अन्तर्राष्ट्रिय कल बाइपास गर्ने गरिएको फेला परेको हो । प्रहरीको केन्द्रीय अनुसन्धान ब्यूरो (सिआईबी)ले नेपालमा बसेर अन्तर्राष्ट्रिय कल बाइपास गर्ने दुईजनालाई पक्राउ गरेको छ ।
पक्राउ पर्नेमा भारतको मध्यप्रदेश घर भएका २४ वर्षीय विवेक शुक्ला र सिन्धुलीको सुनकोशी स्थायी घर भएका २५ वर्षीय लाल बहादुर मगराती छन् ।
उनीहरुको साथबाट कल बाइपासमा प्रयोग हुने विभिन्न विद्युतीय उपकरण समेत बरामद भएको सिआईबीले जनाएको छ ।
पक्राउ परेकाहरुले काठमाडौं–९ एयरपोर्ट रोडस्थित स्टारगेज होटेलको कोठा नम्बर ३०४ र कागेश्वरी मनहरा–७ शान्तिदिप टोलस्थित भोलाराज गौतमको घरमा अबैध रुपमा कल बाइपास गर्ने सेन्टर सञ्चालन गरिरहेका थिए ।
पक्राउ परेका लालबहादुर मगराँती यसअघि पनि कलबाइपास गरेको अभियोगमा पक्राउ परी १८ महिना जेल बसेका व्यक्ति हुन् ।
भारतीय नागरिक शुक्लाले भने केही समय अगाडि बर्दियाको गुलरियामा कलबाइपास गर्ने सेन्टर सञ्चालन गरेको र त्यसपछि काठमाडौंलाई कार्यक्षेत्र बनाएको सिआईबीको अनुसन्धानबाट पत्ता लागेको छ ।
पक्राउ परेकाहरु विरुद्ध प्रहरीले दूरसञ्चार ऐनअन्तर्गत मुद्दा प्रक्रिया अगाडि बढाएको छ ।
प्रहरीले अहिलेसम्म १०२ स्थानहरुमा सञ्चालित कल बाइपास सेन्टरमा छापा मारी १२६ नेपाली ३२ विदेशी गरी १५८ लाई पक्राउ गरेको छ । पक्राउ परेका विरुद्ध ११ अर्ब ९० करोड ३६ लाख ६२ हजार रुपैयाँको बिगो माग दावी गर्दै मुद्दा दर्ता भएको छ ।
