१८ असार २०८३, बिहीबार
काठमाडौं, २७ वैशाख– भारतीय प्रधानमन्त्री नरेन्द्र मोदीको शुक्रबारबाट हुने दुईदिने भ्रमणको तयारी अन्तिम चरणमा पुगेको छ । मोदी जाने स्थानमा सुरक्षा व्यवस्था कडा पारिएको छ भने उनको स्वागतका लागि तयारी तीव्र छ ।
भारतीय प्रधानमन्त्री मोदीको जनकपुर भ्रमणलाई सुरक्षित र व्यवस्थित बनाउन ६ हजार सुरक्षाकर्मी परिचालन गरिएका छन् । सुरक्षा निकायका सबै अंगलाई ‘हाइ एलर्ट’ राखिएको छ ।
उता मुस्ताङमा पनि सुरक्षा व्यवस्था कडा पारिएको छ । जिल्लाका सीमा नाकामा पदयात्रीलाई शुक्रबार र शनिबार आवतजावतमा रोक लगाइएको छ भने मुक्तिनाथ मन्दिर प्रवेशमा पनि रोक लगाइएको छ ।
भ्रमणका क्रममा मोदीको व्यस्तता पनि त्यत्तिकै रहने छ । निकै व्यस्त भ्रमण तालिकासहित प्रदेश २ को अस्थायी राजधानी जनकपुरबाट उनको दुई दिने भ्रमण शुरु हुन लागेको हो । मोदीले शुक्रबार जनकपुरमा दुई घण्टा बिताउने छन् ।
मोदीले जानकी मन्दिरमा पूजापाठ, रामायण सर्किटको उद्घाटन र जनकपुर–अयोध्या बस सेवा उद्घाटन तथा नागरिक अभिनन्दन कार्यक्रममा सम्बोधन गर्ने तय भएको छ ।
भारतबाट सीधै जनकपुर आउने भारतीय प्रधानमन्त्री मोदीलाई विमानस्थलमा रक्षामन्त्री ईश्वर पोखरेल र प्रदेश २ का मुख्यमन्त्री मोहम्मद लालबाबु राउतले स्वागत गर्नेछन् ।
भारतीय वायुसेनाका तीनवटा हेलिकप्टरमा मोदी र उनको टिम शुक्रबार बिहान १० बजेतिर जनकपुर अवतरण गर्ने कार्यतालिका छ । मोदीको कारगेड आउने विमानस्थलदेखि जानकी मन्दिर र रंगभूमि मैदानसम्मको सडक कालोपत्रे गरिनुका साथै सिँगारिएको छ ।
मोदीको कारगेड गुड्ने सडकछेउका घरहरूमा कलश राख्न प्रदेश सरकारले अपिल पनि गरेको छ ।
