०२ असार २०८३, मंगलबार
काठमाडौं, ३ असार– राष्ट्रिय सभाका सदस्यहरुको कार्यकाल निर्धारण गर्नका लागि भोलि गोला प्रथा हुँदैछ ।
आफ्नो कार्यकाल आफैंले गोलाप्रथाबाट निर्धारण गर्ने संवैधानिक प्रावधान अनुसार राष्ट्रियसभा सदस्यहरुको कार्यकाल चयन हुनेछ ।
नेपालको संविधानको धारा ८६ अनुसार राष्ट्रिय सभाका ५९ मध्ये २० जनाको कार्यावधि ६ वर्षको, २० जनाको ४ वर्षको र १९ जनाको २ वर्षको हुनेछ । कसको पदावधि कति हुने भन्ने कुरा गोलाप्रथाले निर्धारण गर्नेछ । वर्तमान
सरकारका गृहमन्त्री रामबहादुर थापा र अर्थमन्त्री युवराज खतिवडाको कार्यकाल कति रहने छ भन्ने निर्धारण भोलिको गोलाप्रथाले तय गर्नेछ ।
कथंकदाचित गोलाप्रथामा थापा र खतिवडाको २ वर्षे पदावधि निर्धारण गरिदियो भने उनीहरु मन्त्री नरहेन अवस्था बन्न जान्छ ।
संविधान अनुसार मन्त्री हुनको लागि संघीय या राष्ट्रिय सभामध्ये एकको सदस्य हुनु अनिवार्य छ । तर कार्यकाल सकिएपछि उनीहरु पुन निर्वाचित भएर आउन सक्ने छन् ।
राष्ट्रिय सभा सचिवालयले गोलाप्रथामा वर्णानुक्रमअनुसार भाग लिने व्यवस्था मिलाएको छ ।
गोलाप्रथा छनौट गर्न सेता कागजमा रातो अक्षरमा दुई, चार र छ वर्ष लेखेर बट्टाभित्र राखी बन्द गराइन्छ र राष्ट्रिय सभा सदस्यलाई ति कागजहरू झिक्न लगाइन्छ । यसका लागि संघीय संसद सचिवालयले महासचिवको संयोजकत्वमा आन्तरिक समिति र कार्यविधि बनाएको छ ।
राष्ट्रिय सभा सचिवालयका उपसचिवले असार ४ गते सोमबार बिहान नयाँ बानेश्वरस्थित संघीय संसद भवनमा गोलाविधिद्वारा सदस्यहरूको पदावधि निर्धारण कार्यक्रम शुरु हुने जानकारी दिएका छन् ।
