काठमाडौं, २८ मंसिर –सरकारले काठमाडौं उपत्यकामा ५० वटा ठूला बस सञ्चालन गर्नेगरी प्रक्रिया अघि बढाएको छ । गत साउनमा प्रधानमन्त्री भएलगत्तै पुष्पकमल दाहाल ‘प्रचण्ड’ले उपत्यकासहित विभिन्न शहरमा अत्याधुनिक सुविधासहितका सय वटा ठूला बस सञ्चालन गर्ने घोषणा गरेसँगै सरकारले सोको प्रक्रिया अघि बढाएको हो ।
सङ्घीय मामिला तथा स्थानीय विकास मन्त्रालयले काठमाडौं उपत्यकामा ५० र मुलुकका अन्य ठूला शहरमा बाँकी ५० वटा बस सञ्चालन गर्नेगरी तयारी अघि बढेको बताएको छ । काठमाडौं उपत्यकाका साथै पोखरा, वीरगञ्ज, धनगढी, नेपालगञ्ज, विराटनगर लगायतका शहरमा नगरपालिका मातर्फ ठूला बस सञ्चालनमा ल्याइने छ । बस सञ्चालनका लागि अन्य विभिन्न नगरपालिकाबाट पनि प्रस्ताव आएको मन्त्रालयको भनाई छ ।
काठमाडौं उपत्यकाबाहेकका कुन शहरमा कति बस सञ्चालन गर्ने भन्नेबारे भने निर्णय भइनसकेको मन्त्रालयले जनाएको छ । बस खरिदका लागि सङ्घीय मामिला तथा स्थानीय मन्त्रालयले करिब १ महिनाअघि अर्थ मन्त्रालसँग ६८ करोड रुपैयाँ माग समेत गरिसकेको छ ।
बस सञ्चालनका लागि मन्त्रालयले काठमाडौं महानगरपालिकाको संयोजकत्वमा विभिन्न नगरपालिका सम्मिलित एक कम्पनी स्थापना गर्ने तयारी गरेको छ । उक्त कम्पनीमा सम्बन्धित महानगरपालिका, उपमहानगरपालिका तथा नगरपालिकाको निश्चित हिस्सा शेयर रहनेछ । ‘यही कम्पनीमार्फत बस सञ्चालनमा ल्याइनेछ,’ सङ्घीय मामिला तथा स्थानीय विकास मन्त्रालयका सह–सचिव जीवनकुमार श्रेष्ठले भने ।
अर्थ मन्त्रालयबाट बजेट प्राप्त भएसँगै कम्पनी दर्ता प्रक्रिया अगाडी बढ्ने श्रेष्ठले बताए । सोही कम्पनीले उपत्यका दिगो सहरी यातायात विकास आयोजनाले तय गरेको मापदण्ड अनुसारका रुट तथा प्रावधानका आधारमा बस गरिद गरी सञ्चालनमा ल्याउने छ । ‘अर्थ मन्त्रालयबाट बजेट निकासा भएपछि बस खरिदका लागि टेण्डर प्रक्रिया अघि बढाउनेछौं,’ मन्त्रालयका सह–सचिव श्रेष्ठले लोकान्तरसँग भने ।
काठमाडौं महानगरपालिका प्रशासन शाखा प्रमुख हरिबहादुर कुँवरले बस सञ्चालनका लागि प्रवन्धपत्र, डिजाइन र स्केच अन्तिम चरणमा पुगेको बताए । सडकको आकार अनुसार चक्रपथ, ठूला सडक र भित्री सडक हेरेर सोही आकारका बस सञ्चालन गरिने उनले बताए ।
चालू आवभित्रै सय नयाँ बस सञ्चालन गर्ने मन्त्रालयको योजना छ । साना सवारीका कारण ट्राफिक जाम बढेको र यात्रुले पनि सास्ती व्यहोर्नुपरेको भन्दै सरकारले तुलनात्मक रूपमा ठूला र स्तरिय बस सञ्चालन गर्ने तयारी अघि बढाएको हो । यसअघि काठमाडौं महानगरपालिकाले साझा यातायात सँगको सहकार्यमा ३० वटा ठूला बस सञ्चालन गरेको छ ।
