काठमाडौं– शिक्षामन्त्री गिरिराजमणि पोखरेलले चिकित्सा क्षेत्रका वेथितीविरुद्ध जुम्लामा आमरण अनसनरत डा. गोविन्द केसीको स्वास्थ्य कमजोर भए उनलाई बल प्रयोग गरेर भएपनि काठमाडौं ल्याउने बताएका छन् । 

सरकारले यसअघि पनि डा.केसीलाई काठमाडौं ल्याउने प्रयास गरेको थियो । शुक्रवार शिक्षा पत्रकारिता पुरस्कार वितरण कार्यक्रममा मन्त्री पोखरेलले डा.केसीको स्वास्थ्य अबस्था कमजोर भए काठमाडौं ल्याउन सकिने बताएका हुन् । ‘उहाँको स्वास्थ्य कमजोर भए बल गरेर पनि काठमाडौं ल्याउनु पर्ने हुनसक्छ’ पोखरेलले भने । 

मन्त्री पोखरेलले डा.केसीको उपचारका लागि सरकारले चिकित्सकको टोली पठाउने तयारी गरेको जानकारी दिए । सरकारले डा.केसीलाई काठमाडौं ल्याउनको लागि हेलिकप्टर तयारी अबस्थामा राखेको छ । 

डा केसीको जीवन रक्षाका लागि संघीय संसदका दुबै सदनमा भएको जरुरी सार्वजनिक महत्त्वको प्रस्ताव माथिको छलफलमा शिक्षा मन्त्री पोखरेलले डा केसीलाई काठमाडौं ल्याउन सहयोग गर्न सबैसंग आग्रह गरेका थिए । 
यसअघि प्रतिनिधि सभाको बैठकमा सम्वोधन गर्दै गृहमन्त्री रामबहादुर थापाले पनि डा केसीलाई काठमाडौं ल्याउनको लागि हेलिकप्टर तयारी अबस्थामा राखिएको बताएका थिए । उनले डा केसीको हठ र जिद्दीका कारण काठमाडौं ल्याउन नसकिएको बताएका थिए । 

डा केसीले भने सरकारसंग जुम्लामै गएर वार्ता गर्ने अडान लिँदै आएका छन् । डा केसीको स्वास्थ्य कमजोर बन्दै गएको भन्दै उनका समर्थकले माग पूरा गर्न सरकारमाथि दवाव सिर्जना गर्दै आएका छन् । तर केसीसँग वार्ताका लागि सरकार जुम्ला नजाने शिक्षामन्त्री पोखरेलले बताएका छन् ।