काठमाडौं– म्यानपावर व्यवसायीहरुले रोजगारका लागि कुवेत जाने नेपाली युवाबाट प्रतिव्यक्ति १ लाख ५० हजार रुपैयाँसम्म असुल्ने गरेको पाइएको छ । 

वैदेशिक रोजगार विभागले आइतवार काठमाडौंको बसुन्धारास्थित अल स्किल्स  नामक म्यानपावर कम्पनीमा छापा मार्दा कुवेत जाने नेपालीबाट अवैध रुपमा चर्को रकम असुल्ने गरेको तथ्य फेला परेको हो । 

विभागका प्रवक्ता उद्धवप्रसाद रिजालका अनुसार म्यानपावर कम्पनीले कुवेत जाने ३५ नेपाली कामदारबाट प्रतिव्यक्ति १ लाख ५० हजार रुपैयाँ उठाएको हो । 

कानूनअनुसार रोजगारीका लागि विदेश जाने नेपालीबाट म्यानपावर कम्पनीले सेवाशुल्कवापत १० हजार रुपैयाँ मात्रै लिन पाउँछन् । 

विशेष सूचनाका आधारमा विभागले अवैध रकम असुली गर्ने म्यानपावर कम्पनीमा छापा मारी कागजात जफत गरेको छ । १ लाख ५० हजार रुपैयाँ दिएका कामदारको रकम फिर्ता गराइ उनीहलाई मंगलवारको उडानबाट कुवेत उड्ने व्यवस्था मिलाइएको वैदेशिक रोजगार विभागका प्रवक्ता रिजालले लोकान्तरलाई बताए ।