३१ जेठ २०८३, आइतबार
काठमाडौं– साहित्यकार तथा सञ्चारकर्मी यज्ञनिधि दाहालको पार्थिव शरीर श्रद्धाञ्जलीका लागि अहिले काठमाडौंको मण्डिखाटारमा रहेको घरमा राखिएको छ । अहिले उनका शुभचिन्तक र आफन्तले अन्तिम श्रद्धाञ्जली दिँदैछन् ।
दाहालकी श्रीमती सुदाले सेतो कपडा ओढाएपछि उनको शव श्रद्धाञ्जलीको लागि राखिएको हो । दाहालको इच्छा अनुसार नै दिउँसो १२ बजे उनको शव त्रिवि शिक्षण अस्पताल महाराजगञ्जलाई हस्तान्तरण गर्ने तयारी छ ।
शव अस्पताललाई हस्तान्तरण गर्ने भएकाले श्रद्धाञ्जली दिने क्रममा शवमा अबिर र फूलमाला नचढाउन आफन्तले आग्रह गरेका छन् । दाहालको इच्छा अनुसार नै फूलमाला नचढाउन आग्रह गरेको हो ।
गएको बुधबार बिहान खाना खाएर धारामा थाल राखेर फर्कने क्रममा उनी लडेका थिए । लडेपछि उनको टाउकोमा रगत जमेको थियो । दुवै मृगौला खराब भएका दाहालले डायलाइसिस गरिरहेका कारण उनको मष्तिस्कको शल्यक्रिया गर्न सकिएको थिएन ।
दुई दिन काठमाडौंको अन्नपूर्ण न्यूरो अस्पतालमा उपचार गरेपछि उनलाई ललितपुरको सुमेरु अस्पतालमा लगिएको थियो । उपचारकै क्रममा उनको सुमेरु अस्पतालमा शुक्रबार निधन भएको हो ।
