०३ असार २०८३, बुधबार
काठमाडौं– चौथो बिमस्टेक सम्मेलनमा सहभागी हुन काठमाडौं आएका सदस्य देशका राष्ट्रप्रमुख तथा सरकार प्रमुखको सवारीका कारण राजधानी काठमाडौंको यातायात प्रभावित भएको छ ।
भीभीआईपीको सवारीका लागि राजधानी काठमाडौंका मूख्य सडकहरु खाली गराइएका छन् ।
राजधानीको सोल्टीमोडमा आयोजित उद्घाटन सत्र पछि सम्मेलनमा सहभागी भएका पाहुनाहरु रात्रिभोजका लागि होटेल हायाततर्फ गइरहेका छन् ।
भीभीआईपीको सवारीका कारण राजधानी काठमाडौंको रत्नपार्क, सुन्धारा, नायाँ बानेश्वर, चाबहिल, गौशालालगायत क्षेत्रमा अन्य सवारी साधन चल्न नदिएर सडक खाली गराइएको छ ।
जसका कारण कार्यालय समय सकिएर घरतर्फ फर्किन लागेका सर्वसाधारणहरुले सास्ती खेप्नु परेको छ ।
राजधानीको सुन्धारामा गाडी नपाएर धेरै यात्रुहरु अलपत्र परेका छन् भने केही पैदल हिँडेर निवासतर्फ लागेका छन् ।
सार्वजनिक सवारी चल्न नदिँदा राजधानीको चाबहिलमा केही समय अलपत्र परेका यात्रुहरुले सरकारविरुद्ध नाराबाजी समेत गरेका थिए ।
साँझ पर्न थालेपछि धेरै यात्रुहरु भने सरकारलाई सराप्दै पैदल हिँडेर घरतर्फ लागेका छन् ।
