१७ असार २०८३, बुधबार
काठमाडौं — इंग्ल्यान्डका कीर्तिमानी ब्याट्स्म्यान एलेस्टर कूकले अन्तर्राष्ट्रिय क्रिकेटबाट संन्यास लिने घोषणा गरेका छन् ।
पूर्व कप्तान कूकले सन् २००६ मा डेब्यु गरेदेखि १२ हजार भन्दा बढी टेस्ट रन र ३२ वटा शतक बनाएका छन् ।
कूकको फर्म हालैको समयमा खस्किएको थियो । अस्ट्रेलिया, पाकिस्तान र भारतविरुद्धका खेलमा उनले राम्रो प्रदर्शन गर्न सकेका थिएनन् ।
इंग्ल्यान्डले भारतविरुद्धको टेस्ट शृंखला जितेको भएपनि कूकले सात इनिङमा जम्मा १०९ रन बनाउन सकेका थिए ।
भारतविरुद्धको शृंखलाको अन्तिम म्याच शुक्रवारदेखि शुरू हुँदैछ र कूकले त्यसपछि अन्तर्राष्ट्रिय क्रिकेटबाट संन्यास लिनेछन् ।
उनले भने, ‘विगत केही महिनायता लामो सोचविचार गरेपछि मैले यो टेस्ट शृंखलापछि संन्यास लिने घोषणा गरेको छु । मेरो लागि यो दुःखद दिन भएपनि मैले देशका लागि गर्नसक्ने सबै गरेको र अब मसँग केही बाँकी नरहेको भन्ने मलाई लाग्छ ।’
कूकले १२ वर्षअघि भारतविरुद्धको डेब्यु म्याचमै शतक प्रहार गरेका थिए ।
उनले इंग्ल्यान्डका लागि कीर्तिमान ५९ टेस्टमा कप्तानी समेत गरेका थिए र गत वर्ष जो रूटलाई कप्तानी सुम्पेका थिए ।
उनी आगामी सीजनमा इसेक्सका लागि काउन्टी क्रिकेट खेलिरहनेछन् ।
एजेन्सी
