०३ असार २०८३, बुधबार
काठमाडौं — अमेरिकाका राष्ट्रपति डोनल्ड ट्रम्पले चिनियाँ सामानमा अर्को चरणमा थप आयातशुल्क लगाउन निर्देशन दिएको अमेरिकी सञ्चारमाध्यमले जनाएका छन् ।
चीनबाट आयात हुने २०० अर्ब डलर बराबरका आयातमा शुल्क लगाइने अपेक्षा छ । ती सामानमा विद्युतीय पाटपुर्जा र हातेझोला पनि पर्छन् ।
नयाँ आयातशुल्क २५ प्रतिशतसम्म बढ्न सक्ने सम्भावना छ तर यसलाई कहिलेदेखि लागू गरिने हो त्यो चाहिँ स्पष्ट छैन ।
अधिकारीहरूले सामानको अन्तिम सूचीमा अझै काम गरिरहेको बताइएको छ ।
ट्रम्पले आफ्ना कर्मचारीलाई यही ग्रीष्ममा आयातशुल्कको तयारी गर्ने आदेश दिएका थिए जसकारण अमेरिका र चीनबीच व्यापारयुद्ध चर्केको छ । अमेरिकाले चीनमाथि अवैध व्यापारनीति अपनाएको आरोप लगाउँदै आएको छ ।
नयाँ शुल्क पहिले नै लगाइएका शुल्कमा थपिने भएको हो । अमेरिकाले ५० अर्ब डलरबराबरका चिनियाँ सामानमा आयातशुल्क लगाइसकेको छ । चीनले प्रतिशोधस्वरूप ५० अर्ब बराबरको अमेरिकी सामानमा आयातशुल्क लगाएको
छ ।
बीबीसीबाट
