०६ असार २०८३, शनिबार
काठमाडौं– सडक बालबालिकाको संरक्षणको क्षेत्रमा बाह्र वर्षदेखि काम गर्दै आएको एपि.सि. नेपालको अध्यक्षमा डा. मुकुन्द पथिक वाग्ले निर्वाचित भएका छन् । आइतबार काठमाडौंमा सम्पन्न १२औं साधारण सभाबाट पथिक दोस्रो कार्यकालका लागि सर्वसम्मत रुपमा चयन भएका हुन् ।
कार्यक्रमको उद्घाटन गर्दै समाज कल्याण परिषद्का कोषाध्यक्ष वीरबहादुर ठगुन्नाले लामो समयदेखि ए.पि.सि. नेपालले सडक बालबालिकालाई संरक्षण गरेकोमा खुसी व्यक्त गरे । नवनिर्वाचित अध्यक्ष डा. पथिकले आगामी दिनहरुमा ए.पि.सि.नेपाललाई अझैं व्यवस्थित ढङगले सञ्चालन गरिने बताए ।
यसैगरी महिला, बालबालिका तथा जेष्ठ नागरिक मन्त्रालयका उपसचिव सुनिता नेपालले लामो समयदेखि ए.पि.सि.नेपालले चुनौतीपूर्ण कार्यक्रमहरुमा काम गर्दै आएको बताइन् । कार्यक्रममा केन्द्रिय बालकल्याण समितिका सुनिता शाह, बालबालिका खोजतलास केन्द्रलगायत विभिन्न विद्यालय, अभिभावक तथा बालबालिकाहरुको उपस्थिति रहेको थियो ।
संस्थाले गरेका गतिविधि तथा आगामी कार्यक्रमहरुका बारेमा संस्थाका कार्यकारी निर्देशक निलकण्ठ आचार्यले प्रकाश पारे भने बोर्डका सचिव अमृतरत्न मानन्धरले सबैलाई स्वागत गरे । अनिमा खड्काले सञ्चालन गरेको कार्यक्रममा आव २०७४/७५को सामाजिक लेखा परिक्षण समेत भएको थियो ।
