काठमाडौं–कास्कीका प्रजिअ सहसचिव तारानाथ अधिकारी साउन २० गते विमानस्थल अध्यागमनमा सरुवा भए । 
कार्यभार सम्हालेको १५ दिन नबित्दै सरुवा भएर प्रहरी किताबखाना पुगे ।
आजको कान्तिपुर दैनिक लेख्छ– उनी सरुवा भएलगत्तै विमानस्थल अध्यागमनको नेतृत्व निमित्त प्रमुख लक्ष्मणविक्रम थापाले सम्हाले । थापाले निमित्त सम्हालेको १५ दिनपछि नै अध्यागमन प्रमुखका रूपमा राजेश पौडेल आइपुगे । 
अध्यागमनका प्रमुखहरूको तारन्तार हुने अदलीबदलीको यो घटना नयाँ भने होइन । 
यसअघि पनि डेढ वर्षभन्दा लामो समय कोही बसेको इतिहास छैन । २०७३ असार १६ गते अध्यागमन प्रमुख भएर आएका यज्ञराज कोइराला दुई महिनापछि सरुवामा परे । उनीपछि उद्धवप्रसाद भट्टराई झन्डै ४ महिना कामु र १३ महिना प्रमुख रहे । त्यसपछि होमनाथ थपालियाले १४ महिना मात्रै कार्यभार सम्हाले । केही कर्मचारी भने वर्षौंसम्म सरुवा हुँदैनन् ।