छोरी जन्मेकामा चिन्ता गर्ने पुरानो सोच भएकाहरूलाई झापड हान्ने एउटा समाचार आएको छ । छोरीले पनि छोराले जस्तै ठूलठूला उपलब्धि हासिल गर्न सक्छन् भन्ने कुरा यो समाचारले प्रमाणित गरिदिएको छ ।भारतको मध्य प्रदेशको रीवा जिल्लामा रहेको एकै परिवारका तीनजना छोरीले अनौठो उपलब्धि हासिल गरेका छन् । तीनैजनाले एक साथ पिएचडी सिध्याएर विश्व कीर्तिमान कायम गरेका छन् । अवधेश प्रताप सिंह विश्वविद्यालयबाट एकै दिन पिएचडीको उपाधि लिएर यी तीनजना दिदीबहिनीले लिम्का बुक अफ वर्ल्ड रेकर्डमा आफ्नो नाम लेखाउन सफल भएका हुन् । रीवाको सानो गाउँ रकारियामा बस्ने यी तीन दिदीबहिनीले यही भदौ ११ गते पिएचडीको उपाधि लिएका हुन् । लिम्काले यी दिदीबहिनीको रेकर्ड दर्ता गरेर अर्को वर्ष निस्कने वर्षपुस्तिकामा प्रकाशित गर्ने बताएको छ । यी दिदीबहिनीको उपलब्धिबाट पूरा परिवार एकदमै खुशी छ र त्यो इलाका नै गौरवान्वित भएको छ । हाल तीनैजनाको बिहा भइसकेको छ र उनीहरू दिल्लीमा बस्ने गरेका छन् । पञ्चायत इन्स्पेक्टर विजयशंकर मिश्राका यी छोरीहरू नारीशक्तिका अनुपम उदाहरण हुन् । अर्चना मिश्राले ‘भारतका परम्परामा बाँधिएका नारी : एक अध्ययन’, अञ्जना मिश्राले ‘रीवामा खानेपानीको गुणस्तर र पानीजन्य रोग : एक अध्ययन’ र आसू मिश्राले ‘सतना जिल्लाको खानेपानीको भौतिक रासायनिक तथा जीववैज्ञानिक तत्वको मूल्यांकन’ विषयमा पिएचडी गरेका हुन् ।