१३ असार २०८३, शनिबार
काठमाडौं — दक्षिण अमेरिकाको सबभन्दा ठूलो देश ब्राजिलको आगामी राष्ट्रपतिका शीर्ष उम्मेदवार जेर बोल्सोनारोले ब्राजिललाई फेरि महान् बनाउने प्रतिज्ञा गरेका छन् ।
अनि धेरैजनाले ब्राजिलको इतिहासमै सबभन्दा महत्त्वपूर्ण निर्वाचन भनी हेरेको यस चुनावअघिको सर्वेक्षणमा बोल्सोनारो नै अग्रस्थानमा देखिएका छन् ।
‘ब्राजिललाई महान् बनाऔं । आफ्नो गृहभूमिप्रति फेरि एकपटक गर्व गरौं,’ यो उनको नारा हो ।
यी ६३ वर्षीय पूर्वसैनिक घोर दक्षिणपन्थी हुन् र उनी काला जाति तथा समलिंगीहरूप्रतिको शत्रुताका लागि कुख्यात छन् । उनी वातावरणवादी र वामपन्थीहरूलाई पनि पटक्कै मन पराउँदैनन् ।
शनिवार राति उनले आफ्ना ७० लाख फेसबूक फलोअरहरूका लागि लाइभ ब्रोडकास्ट गर्दै अमेरिकी राष्ट्रपति डोनल्ड ट्रम्पकै शैलीमा देशलाई फेरि महान् बनाउने घोषणा गर्न पुगे ।
‘हामीहरू सबै मिलेर ब्राजिललाई परिवर्तन गर्नेछौं,’ उनले भने ।
ब्राजिलमा आइतवार हुन गइरहेको आमनिर्वाचनमा बोल्सोनारोले निकटतम प्रतिद्वन्द्वीभन्दा १५ अंक बढीको अग्रता लिइरहेका छन् । उनका निकटतम प्रतिद्वन्द्वी वर्कर्स पार्टीका उम्मेदवार फर्नान्डो हदाद हुन् । हदाद चाहिँ वामपन्थी
उम्मेदवार हुन् ।
बोल्सोनारो र हदाद दुवैले ५० प्रतिशत मत नल्याउने देखिएकाले दोस्रो चरणको राष्ट्रपतीय निर्वाचन हुने सम्भावना रहेको विश्लेषकहरूले बताएका छन् ।
द गार्डियनबाट
