१४ असार २०८३, आइतबार
काठमाडौं — बलिउडमा चलिरहेको मीटू अभियानमा अनेकौं ठूला नाममाथि यौन दुर्व्यवहारको आरोप लागेको छ ।
पाका अभिनेता आलोक नाथमाथि लेखिका निर्माता विन्ता नन्दाले बलात्कारको आरोप लगाएकी छन् । यो आरोपपछि आलोक नाथ बिरामी परेको खबर आएको छ ।
आलोक नाथका वकिल अशोक सरावगीले उनको खराब स्वास्थ्यका कारण मिडियाले सहयोग गर्नुपर्ने बताएका छन् । एकदुई दिनमा आलोक नाथ आफैं आएर मिडियासँग कुरा गर्ने उनले जानकारी दिए ।
उनी मानसिक रूपमा स्तब्ध भएको र आरोपहरूमा कस्तो कानूनी कारवाही चलाउने भनी निश्चित नभएको वकिलको भनाइ छ ।
आलोक नाथका तर्फबाट वकिलले उनीमाथि लागेका सबै आरोप गलत भएको बताएका छन् । तारा सिरियलमा आलोक र विन्ताबीच झगडा भएकाले त्यसको तुष उनले यत्तिका वर्षपछि निकालेको वकिलको बयानमा उल्लेख छ ।
विन्ताले लामो फेसबूक पोस्ट लेखेर आलोक नाथको नाम नलिइकनै उनले आफूलाई रेप गरेको आरोप लगाएकी थिइन् ।
एजेन्सी
