२७ असार २०८३, शनिबार
लहान– यहाँस्थित दुई वटा सरकारी कार्यालय अन्यत्र सार्न खोजेको भन्दै सिरहाका जनप्रतिनिधि तथा राजनीतिक दलले विरोध गरेका छन् ।
प्रदेश नं २ सरकारको निर्देशनमा यहाँस्थित जलस्रोत तथा सिँचाइ विकास डिभिजन कार्यालय र खानेपानी तथा सरसफाइ डिभिजन कार्यालय अन्यत्र सार्न खोजेको भन्दै विरोध गरिएको हो ।
जलस्रोत तथा सिँचाइ कार्यालय सदरमुकाम र खानेपानी तथा सरसफाइ कार्यालय राजविराज सार्न लागिएको भन्दै नेपाली काङ्ग्रेसका नेता तथा कार्यकर्ताले दुवै कार्यालयमा तालाबन्दी गरेका छन् । नगर सभापति सुनीलकुमार महतोको नेतृत्वमा गएका नेता कार्यकर्ताले जलस्रोत डिभिजन प्रमुखको कार्यकक्ष, योजना शाखा, प्रशासन फाँट तथा खानेपानी डिभिजन प्रमुखको कार्यकक्षमा ताला लगाएका छन् ।
लहान नगर कार्यपालिकाको बैठकबाट कार्यालय अन्यत्र सार्न नदिने निर्णयसमेत गरिएको छ । सिँचाइ कार्यालयको समान बाहिर नलैजान भन्दै उक्त कार्यालयमा नगरपालिकाको तर्फबाट सूचना टाँस गरिएको प्रमुख मुनी साहले जानकारी दिए ।
सखुवानन्कारकट्टी गाउँपालिकाका अध्यक्ष केदारनाथ यादव र भगवानपुर गाउँपालिकाका अध्यक्ष बेचन यादवलेसमेत सो विरोध कार्यक्रममा ऐक्यबद्धता जनाएका छन् । सिँचाइ डिभिजन कार्यालयका प्रमुख श्यामनन्दन यादवले प्रदेश सरकारको निर्णयानुसार सार्न लागिएको जानकारी दिए ।
