काठमाडौं– आफूविरुद्ध काठ तस्करी गरेको सूचना दिएको भन्दै नर्सरीमा काम गर्ने मजदुरको हत्या गर्ने व्यक्ति २३ वर्षपछि पक्राउ परेका छन् । 

सुनसरीको साविक प्रकासपुर गाविस–५ स्थित स्थानीय नर्सरीमा कार्यरत नारायण साह ४ कात्तिक २०५२ मा मृत फेला परेका थिए । घटनाको अनुसन्धानपछि सोही ठाउँ बस्ने राजेन्द्र राईको संलग्नता रहेको पत्ता लागेको थियो । 

सर्वोच्च अदालतले ५ चैत २०६० को फैसला गर्दै राजेन्द्र राईविरुद्ध कर्तव्य ज्यान मुद्दामा २० वर्षको कैद सजाय सुनाएको थियो । 

साहको हत्यापछि फरार रहेका तिनै साही गत शनिवार (कात्तिक १७ गते) पक्राउ परेका छन् । राईलाई प्रहरीको केन्द्रीय अनुसन्धान ब्यूरो (सिआईबी)ले सुनसरीको ठाकुरबारीबाट पक्राउ गरेको हो । 

राईले आफूविरुद्ध काठ तस्करी गर्ने गरेको सुराकी गरेको भन्दै नारायण साहलाई कुटेर मारेका थिए । पक्राउ परेका राईलाई फैसला कार्यान्वयनका लागि अदालतको आदेशानुसार जिल्ला कारागार उदयपुर पठाइएको सिआईबीले जनाएको छ ।