काठमाडौं, २० फागुन– नेपालमा लोडसेडिङ हट्नुमा आफ्नो भूमिका रहेको भारतीय पक्षले दाबी गरेको छ । जनार्दन शर्मा उर्जामान्त्री भएसँगै नेपाल विद्युत प्राधिकरणको कार्यकारी निर्देशक बनेका कुलमान घिसिङको कुशल कार्यक्षमताका कारण उपत्यकासहित देशका विभिन्न भागलाई लोडसेडिङ मुक्त बनाइएको भनिएको बेला भारतले यस्तो दाबी गरेको हो ।
नेपालका लागि भारतका कार्यवाहक राजदूत विनय कुमारले नेपालको लोडसेडिङ अन्त्यमा भारतको भूमिका रहेको दाबी गरेका हुन् ।
बारामा शुक्रबार नीति अनुसन्धान प्रतिष्ठान, नेपाल, अन्तर्राष्ट्रिय सहयोग परिषद् भारत र नेपाल भारत सहयोग मञ्च, वीरगञ्जको संयुक्त आयोजनामा भएको एक गोष्ठीको उद्घाटन कार्यक्रममा बोल्दै उनले अब भारतको सहयोगबाट नेपालले कहिले लोडसेडिङ भोग्नुनपर्ने दिन आउन लागेको समेत बताए ।
‘मुख्य शहरहरूमा लोडसेडिङ अन्त भइसकेको छ, अब नेपालभर लोडसेडिङ अन्त हुन्छ ,’ कार्यवाहक राजदूत कुमारले भने,‘भारतले नेपाललाई आवश्यक पर्ने विद्युत आपूर्ति गरिरहेकाले नेपालको शहरमा बस्ने जनताका लागि लोडसेडिङ इतिहास बनिसकेको छ ।’
रक्सौल परवानीपुरसहितका तीनवटा प्रसारण लाइन निर्माणपछि बढीभन्दा बढी विद्युत प्रसारण गर्न सकिएबाट लोडसेडिङ सदाका लागि अन्त हुने वातावरण बनेको बताए ।
यसअघि आजै भारतका लागि नेपाली राजदूत दीपकुमार उपाध्यायले पनि राजधानीमा आयोजित कार्यक्रममा यस्तै खालको अभिव्यक्ति दिएका थिए ।
