विराटनगर– नेपाली कृषकले गहुँको बिउ पाउन मुस्किल परिरहेको बेला भारत तर्फ बिउ तस्करी हुने गरेको पाइएको छ । सशस्त्र प्रहरीले ठूलो परिमाणमा गहुँको बिउ नियन्त्रणमा लिएपछि सिजनमा बिउ तस्करी हुने गरेको पाइएको हो ।

सशस्त्र प्रहरीले नेपालबाट भारत तर्फ लैजाँदै गरेको अवस्थामा २५ बोरा गहुँको बिउ बरामद गरेको छ । शुक्रवार यता विराटनगरको रानी नाका हुँदै जोगवनीतर्फ लैजाँदै गरेको अवस्थामा सीमा क्षेत्रमा खटिएको सशस्त्र प्रहरी बलले एनल २९७, एनल ९७१, आदित्य जातको गहुँको बिउ बरामद गरेको हो ।

४० किलोको दरले २५ बोरा गहुँको बिउ नियन्त्रणमा लिएको सशस्त्र प्रहरी बल राजश्व अनुसन्धान गुल्मका डीएसपी सुरेन्द्रराज रञ्जीतले बताए । नियन्त्रणमा लिइएको गहुँको बिउ विराटनगर भन्सार कार्यालयमा बुझाइएको छ ।
साइकल, मोटरसाइकल, रिक्सा, ठेलालगायतका साधनमा लैजाँदै गरेको बिउको कुनै कागजात नभेटिएपछि नियन्त्रणमा लिएर भन्सार बुझाइएको रञ्जीतले बताए ।

भारततर्फ लैजाँदै गरेको अवस्थामा नियन्त्रणमा लिइएको गहुँको बिउ कहाँबाट लगिएको हो भन्ने नखुलेको सशस्त्र प्रहरीले जनाएको छ । नेपालमा भन्दा भारतमा  गहुँको बिउ महँगो पर्छ ।  नेपालमा २ हजार ६ सय पर्ने गहुँको बिउ भारतमा ४ हजारको हाराहारीमा पर्ने बताइन्छ ।