काठमाडौं– नेपाली कांग्रेस केन्द्रीय कार्यसमितिको बैठक आज पनि बस्दैछ । पार्टी कार्यालय सानेपामा बिहान ११ बजे बस्ने बैठकमा पार्टीको विधान मस्यौदामाथिको छलफल जारी रहने छ ।

महामन्त्री पूर्णबहादुर खड्का नेतृत्वको समितिले पेस गरेको फरक मतसहितको विधान मस्यौदामाथि सदस्यलेहरुले धारणा राख्ने क्रम जारी छ । विधान मस्यौदामाथिको चौथो दिनको छलफल सकिँदा ३१ जनाले धारणा राखेका छन् । बैठकमा बोल्ने अधिकांश सदस्यले व्यक्तिलाई भन्दा संगठनलाई मजबुद बनाउनु पर्ने बताएका छन् । 

यस्तै आजको बैठकमा सह–महामन्त्री प्रकाश शरण महत नेतृत्वको आर्थिक मस्यौदा समितिले प्रतिवेदन पेस गर्ने तयारी गरेको छ । आगामी महासमिति बैठकमा पेस गर्ने आर्थिक प्रतिवेदन तयार भएकाले सो प्रतिवेदन केन्द्रीय समितिको आजको बैठकमा पेस हुन लागेको कांग्रेसले जनाएको छ । 

कांग्रेसले महासमिति बैठक यही मंसिर २८ देखि पुष ३ गतेसम्म तय गरेको छ ।