१३ असार २०८३, शनिबार
काठमाडौं – नेपालको विभिन्न क्षेत्रबाट भारत पुर्याएर बन्दी अवस्थामा राखिएका ३५ जना नेपाली महिलाको उद्धार गरिएको छ ।
बैंगलुरुस्थित मजिस्टेर सुधा होटलमा बन्दी अवस्थामा राखिएका नेपाली महिलाहरूलाई जनसम्पर्क समिति भारतका अध्यक्ष बालकृष्ण पाण्डेको पहल तथा माइती इण्डिया र भारतीय प्रहरीको सहयोगमा उद्धार गरिएको हो ।
उद्धार गरिएका महिलाहरूलाई भारतस्थित सरकारी आवाशगृहमा सुरक्षित राखिएको उद्धारकर्ता पाण्डेले लोकान्तरलाई जानकारी दिए । उनीहरूलाई भोलि नेपाल ल्याएर नेपाल प्रहरीको विशेष अनुसन्धान ब्यूरो (सीआईबी)लाई जिम्मा लगाउने तयारी भइरहेको पाण्डेले बताए ।
ती महिलाको साथमा श्रमका कागजात, पुलिस रिपोर्ट लगायतका दस्तावेज पनि भेटिएको छ । उनीहरूसँग रहेको कागजात हेर्दा भारतबाट अन्य मुलुक पठाउने तयारी रहेको देखिन्छ ।
नेपाली कांग्रेसका आमन्त्रित केन्द्रीय सदस्य समेत रहेका उद्धारकर्ता पाण्डे भारतमा रहेर लामो समयदेखि नेपालीहरूको हकहितमा क्रियाशील छन् ।
