चितवन, २४ फागुन –स्थानीय तहको निर्वाचनको घोषणा गरिएसँगै यहाँको सुरक्षा समितिले वैध र अवैध हातहतियार खोजी सुरु गरेको छ ।
प्रमुख जिल्ला अधिकारी नारायणप्रसाद भट्टले अनुमति लिई राखिएका हतियार एक साताभित्र सम्बन्धित सुरक्षा निकाय कार्यालय वा जिल्ला प्रशासन कार्यालयमा बुझाउन आग्रह गरिएको बताए ।
अनुमति नलिइएका घरेलु र अन्य हतियारसमेत बुझाउन जिविसले यस्तो आग्रह गरिएको छ ।
एक साताको समयमा त्यस्ता हतियार नबुझाइएमा सुरक्षा निकायले खोजीलाई तीव्रता दिएर कारबाही प्रक्रिया अगाडि बढाउने चेतावनी प्रजिअ भट्टले बताए ।
निर्वाचनलाई नै ध्यानमा राखी जिल्ला प्रहरी कार्यालय चितवनले प्रहरी निरीक्षकको नेतृत्वमा निर्वाचन सेल (एकाइ) समेत गठन गरेको प्रहरी उपरीक्षक दीपक थापाले जानकारी दिए । सेलले निर्वाचनसँग सम्बन्धित सुरक्षाका कार्य अघि बढाउने छ ।
निर्वाचन कार्यालयलाई नेपाल प्रहरी र सशस्त्र प्रहरीले सुरक्षा दिन सुरु गरिसकेका छन् । सबै क्षेत्र र समुदायसँग समन्वय गरेर जिल्लामा निर्वाचनका लागि आवश्यक सुरक्षा प्रबन्ध मिलाइने प्रजिअ भट्टले बताए ।
