२८ असार २०८३, आइतबार
काठमाडौं– काठमाडौंको समाखुसी चोकमा सडक पार गरिरहेका ५ जनालाई एक माइक्रो बसले ठक्कर दिँदा १ जनाको मृत्यु भएको छ ।
थली–कलंकी रुटमा चल्ने बा१ज ९७६६ नम्बरको माइक्रो बसको ठक्करबाट काठमाडौं धुम्बाराही बस्ने सीता दाहालको मृत्यु भएको छ भने लक्ष्मी सापकोट गम्भीर घाइते भएकी छन् । उनलाई ग्रान्डी अस्पतालको आकस्मिक कक्षमा भर्ना गरेर उपचार भइरहेको प्रहरीले जनाएको छ ।
माइक्रोको ठक्करबाट सरिता अधिकारी, सुशीला अधिकारी र सपना राई घाइते भएका छन् । उनीहरुको सामाखुसीस्थित अल नेपाल अस्पतालमा उपचार भइरहेको महानगरीय प्रहरी परिसर काठमाडौंका डिएसपी होबिन्द्र बोगटीले जानकारी दिए ।
सामाखुसी चोकमा जेब्रा क्रसिङबाटै बाटो काटिरहेका ५ जनालाई तीब्र गतिमा आएको माइक्रो ठक्कर दिएको हो । ठक्कर दिने माइक्रोका चालक र सहचालकलाई नियन्त्रणमा लिइएको प्रहरीले जनाएको छ ।
