काठमाडौं–अस्ट्रेलियाका लागि नेपाली राजदूत लक्की शेर्पालाई मन्त्रालयमा भेटेको विषयमा लोकान्तरमा प्रकाशित समाचारप्रति यस अघि नै गरेको खण्डनका सम्बन्धमा परराष्ट्र  सचिव शंकारदास वैरागीले आइतवार थप प्रष्ट पारेका छन् ।   

गएको पुस १२ गते लोकान्तरले मानव तस्करीको आरोप लागेकी राजदूत शेर्पामाथि छानबीन चलिरहेकै बेला सचिव वैरागीले उनलाई मन्त्रालयमा भेट गरेको र त्यसो गर्नु गलत भएको समाचार प्रकाशित गरेको थियो । 

त्यो समाचारको पुस १५ गते खण्डन गर्दै सचिव वैरागीले उक्त समाचार भ्रामक, कपोलकल्पित र आफ्नो चरित्रहत्या गर्ने उद्देश्यले प्रेरित रहेको दावी गरेका थिए । आफूले राजदूत शेर्पालाई सामान्य शिष्टाचार निभाउनका लागि मात्र मन्त्रालयमा भेटेको उनको भनाइ थियो । 

खण्डनका क्रममा सचिव वैरागीले लोकान्तरका सम्पादकका निजी स्वार्थका विषय आफू मार्फत पूरा हुन नसकेको प्रतिक्रियाका रुपमा लोकान्तरमा आफूलाई जोडेर समाचार प्रकाशित भएको आरोप लगाएका थिए । 

आफूमाथि आरोप लागेपछि लोकान्तरका सम्पादकले तत्कालै त्यस्तो आरोपको पुष्टि गर्न चुनौती दिएका थिए । साथै अरोप लगाइनुका आधारसहित सचिव वैगारीसँग लिखित जवाफ माग गर्दै पुस ३० गते पत्र पेश गरेका थिए । 

पत्रको जवाफ दिँदै आइतवार (माघ ६ गते) सचिव वैरागीले प्रकाशित समाचारप्रति विमती जनाउँदा प्रतिक्रिया स्वरुप त्यस्तो आरोप लगाएको तर तथ्यगत प्रसंगमा त्यस्तो नभएको स्पष्ट पारेका छन् । 

‘जहाँसम्म मेरो खण्डन पत्रमा के आधरमा यहाँको निजी स्वार्थसम्बन्धी विषय पर्न पुग्यो भन्ने यहाँको प्रश्न छ, सो विषय तथ्यगत प्रसंग भन्दापनि त्यसवेला सम्प्रेषण भएको म विरुद्धको आधारहीन, भ्रामक एवं चरित्रहत्या गर्ने उद्देश्यले प्रेरित समाचारप्रति विमती जनाउँदा प्रकट हुन पुगेको प्रतिक्रिया थियो । त्यसलाई त्यहित रुपमा वुझिदिन हुन अनुरोध गर्दछु । यहाँको व्यक्तिगत चरित्र, इमान्दारिता र सम्मानमा आँच पुर्याउने मेरो उद्देश्य समेत नभएको स्पष्ट पार्न चाहन्छु” सचिव वैरागीद्धारा जारी प्रष्टीकरण पत्रमा उल्लेख छ ।

सचिव वैरागीले समाचारको खण्डनले विषयलाई केहीहदसम्म प्रष्ट पारेपनि समाचारबाट सृजित भ्रम पूर्णरुपमा सम्बोधन हुन नसकेको पनि बताएका छन् ।  

‘राजदूतबारेको समाचारको खण्डनले विषयवस्तुलाई केही हदसम्म स्पष्ट पार्न मद्दत पुगे पनि मलाई पर्न गएको चोट र समाचारबाट सिर्जित भ्रमलाई पूर्णरुपमा सम्बोधन गर्न नसकेकोप्रति यहाँको ध्यानाकर्षण गराउन चाहन्छु,’ सचिव वैरागीले पत्रमा भनेका छन् । 

साथै सचिव वैरागीले आफ्नो खण्डन प्रकाशित भए पछि लोकान्तरका सम्पादकसँग व्यवसायिक सीमाभित्र रहेर  आफ्नो कुराकानी भएको र त्यसका क्रममा लोकान्तरका सम्पादकले समाचारमा ‘पर्याप्त मात्रमा सावधानी अपनाउन नसकीएको’ विषय स्वीकार गरेको उल्लेख गरेका छन् ।  

‘मेरो खण्डन प्रकाशित भइसकेपछि हामीबीच व्यवसायिक सिमाभित्र रहेर कुराकानी हुन पुगेको थियो । उक्त कुराकानीका क्रममा यहाँले सम्पादकको हैसियतमा मेरो नाम जोडेर प्रकाशित भएको समाचारको प्रस्तुति एवं तथ्यमा केही अपरिपक्कता र सन्तुलनताको सन्दर्भमा पर्याप्त सावधानी अपनाउन नसकिएको स्वीकार गर्नुभएकोमा म धन्यवाद दिन चाहन्छु,’ सचिव वैरागीले आइतवार जारी गरेको स्पष्टीकरण पत्रमा भनिएको छ ।