काठमाडौं– प्रमुख प्रतिपक्षी दल नेपाली कांग्रेसको विरोधका कारण प्रतिनिधि सभाको दोस्रो बैठक पनि स्थगित भएको छ । प्रतिनिधिसभाको सोमवार दिउँसो साढे २ बजे बसेको दोस्रो बैठकमा पनि कांग्रेस सांसदहरु उभिएर विरोध जनाएपछि बैठक भोलि दिउँसो ३ बजे सम्मका लागि स्थगित भएको हो । 

त्यसअघि बसेको बैठकको शुरुमै सभामुखसँग समय लिएर कांग्रेस संसदीय दलका उपनेता विजयकुमार गच्छदारले गिरिजाप्रसाद कोइराला र सुशील कोइरालाको नाममा खुलेका अस्पताललाई संघ मातहत राख्नुपर्ने निर्णय नगर्दासम्म संसद बैठक चल्न नदिने बताएका थिए ।

कांग्रेसको विरोध पछि बै७क मध्यान्ह १२ बजेर ५० मिनेटमा १५ मिनेटका लागि स्थगित भएको थियो । १५ मिनेटका लागि स्थगित बैठक दिउँसो साढे २ बजे बसेको थियो । दोस्रो बैठकमा पनि कांग्रेस सांसदहरु उठेर विरोध जनाएका थिए । बैठकमा चिकित्सा शिक्षा विधेयक पारित गर्ने कार्यसूची थियो । 

गिरिजाप्रसाद कोइराला र सुशील कोइरालाको नामका अस्पतालाई केन्द्र मातहत राख्नुपर्ने मागगर्दै कांग्रेसले सोमवार राष्ट्रिय सभाका बैठक अबरुद्ध गरेको थियो ।