काठमाडौं, २७ फागुन– नेकपा एमालेको तीन दिनका लागि रोकिएको मेची–महाकाली अभियान आजदेखि पुनः सुरु हुँदैछ । अभियानलाई आजदेखि पुनः मकवानपुरको हेटौंडाबाट सुरु गर्न लागिएको एमाले सचिव तथा प्रचार विभाग प्रमुख योगेश भट्टराईले जानकारी दिए ।
यसअघि गत सोमबार सप्तरीमा अभियान अन्तर्गत आमसभा चलिरहेको बेला मधेसी मोर्चा र प्रहरीबीच झडप हुँदा चार जनाको ज्यान गएपछि एमालेले तीन दिनको लागि अभियान स्थगन गरेको थियो ।

एमालेको अनुसार दिउँसो २ बजे हेटौंडाको भुटनदेवी विद्यालय परिसरमा हुने सभालाई एमालेका शीर्ष नेताहरुले सम्बोधन गर्ने कार्यक्रम तय भएको छ ।
हेटौंडाबाट सुरु हुने अभियानमा पहिले जसरी नै हजारौं नेता कार्यकर्ताको सहभागिता हुने एमालेको दाबी छ ।
आज संघीय गठबन्धनले बन्दको आह्वान गरेको भएपनि हेटौंडाको कार्यक्रमका लागि मधेसका जिल्लाहरुबाट समेत नेता कार्यकर्ता सहभागि हुने एमालेले जनाएको छ ।
यद्यपी एमाले सप्तरीकाण्डपछि मधेसका जिल्लामा नजाने बताइएको छ । अब पहाडी भेग र मधेसी मोर्चाको अवरोध नहुने जिल्लामा मात्रै अभियान चलाउने तयारीमा जुटेको एमाले शनिबार हेटौंडाबाट चितवन पुग्ने बताइएको छ ।
यसअघि गत शनिबारदेखि एमालेले काकडभिट्टाबाट आफ्नो १५ दिने अभियानको सुभारम्भ गरेको थियो भने दोस्रो दिन सप्तरीमा पुग्दा चार जनाको ज्यान जाने गरी गोली काण्ड हुन पुगेको थियो ।
सो गोलीकाण्डपछि राजनीति नै तरंगित बनेको छ ।