काठमाडौं– अमेरिकी इतिहासकै सबभन्दा लामो भनिएको सरकारी खर्चबन्दी हालका निम्ति अन्त्य गर्न राष्ट्रपति डोनाल्ड ट्रम्प सहमत भएका छन् । तर उनले माग्दै आएको मेक्सिकोसँगको सिमानामा पर्खाल बनाउने पैसा भने पाएका छैनन् ।

यसअघि राष्ट्रपति ट्रम्पले संसदले उनले सीमा पर्खालका लागि चाहेको पौने ६ अर्ब डलर बजेट नदिएसम्म सरकारी खर्चबन्दी जारी राख्ने चेतावनी दिएका थिए । तर दुवै पार्टीका नेताहरूको छलफलपछि सिनेटले एकमतले सरकारी निकायहरूलाई तीन सातासम्म कोष उपलब्ध गराउने कानुन पारित र्गयो । सीमा सुरक्षाबारे भने कुराकानी जारी रहने बताइएको छ।

उक्त कानुनलाई राष्ट्रपतिलाई हस्ताक्षरका निम्ति पठाइने बताइएको छ । गएको ३५ दिनदेखि आठ लाख संघीय कर्मचारीहरूले विना तलब काम गरिरहेका छन् । पछिल्लो सहमति अनुसार आगामी तीन सातासम्म संघीय निकायहरूलाई कोष उपलब्ध हुनेछ ।

अमेरिका र मेक्सिकोको सिमानामा पर्खाल बनाउन कुनै कोष छुट्ट्याइएको छैन । अवैध आप्रवासीलाई रोक्न उक्त पर्खाल आवश्यक भएको ट्रम्पले भन्दै आएका छन् । 
शुक्रवार सिनेट र प्रतिनिधिसभाले खर्चबन्दीलाई अस्थायी अन्त्य गर्ने विधेयक एकमतले पारित गरेका हुन् । आम जनमतहरूले अधिकांश अमेरिकीले खर्चबन्दीका लागि ट्रम्पलाई दोषी मानेको देखाएका थिए । त्यसैले पछिल्लो सहमतिका लागि ट्रम्प राजी भएको हुनसक्छ ।