१७ असार २०८३, बुधबार
काठमाडौं – प्रमुख प्रतिपक्षी दल नेपाली कांग्रेसको विरोधका कारण सोमवार बसेको राष्ट्रिय सभाको दोस्रो बैठक पनि अवरुद्ध भएको छ ।
१५ मिनेटका लागि स्थगित गरिएपछि बसेको दोस्रो बैठक शुरू हुनासाथ कांग्रेस सांसदले उभिएर विरोध जनाएका थिए ।
कांग्रेस सांसदको विरोधका वाबजुद सभाका अध्यक्ष गणेश तिमिल्सिनाले प्रतिनिधि सभाबाट पारित चिकित्सा शिक्षा विधेयक टेबुल गर्न सचिवलाई अनुमति दिए । त्यसपछि कांग्रेस सांसदहरू नारावाजी गर्दै वेल घेराउ गर्न पुगेका थिए ।
उनीहरूले संसदीय सर्वोच्चता कायम गर, बलजफ्ती बन्द गर लगायतका नाराबाजी गरेका थिए । त्यसपछि बैठक आधा घण्टाका लागि स्थगित भएको छ ।
प्रतिपक्षी दलको विरोधबीच विधेयक टेबुल भएको छ । कांग्रसको विरोधबीच प्रतिनिधि सभाको शुक्रवारको बैठकले चिकित्सा शिक्षा विधेयक पारित गरेको थियो ।
