लोकान्तर संवाददाता
२७ फागुन, काठमाडौं –खाना पकाउने ग्यासको मूल्य फेरि बढेको छ । नेपाल आयल निगमले शुक्रवार राती १२ बजेदेखि लागू हुनेगरी खाना पकाउने एलपी ग्यासको मूल्य प्रतिसिलिण्डर २५ रुपैयाँले वृद्वि गरेको हो ।
यससँगै खाना पकाउने ग्यासको प्रतिसिलिण्डर मूल्य १३ सय ७५ पुगेको छ । हालसम्म १३ सय ५० रुपैयाँ कायम रहेको मूल्यमा बढाइएको हो ।
यसअघि केही समयअघिमात्र निगमले ग्यासको प्रतिसिलिण्डर मूल्य २५ रुपैयाँले वृद्वि गरेको थियो ।
निगमका अनुसार हाल प्रतिसिलिण्डर ग्यासमा ३ सय १३ दशमलव ५१ रुपैयाँ घाटा छ । ‘अत्यधिक घाटा भएकाले सो पूर्ति गर्न मूल्यवृद्वि गरेका हौं,’ निगमका प्रवक्ता सिताराम पोखरेलले लोकान्तरसँग भने ।
ग्यासबाहेकका अन्य इन्धनको मूल्य भने यथावत रहेको निगमले बताएको छ ।
तस्बिर स्रोत : न्यूविजनेस एज डटकम
