काठमाडौं– नेपाली कांग्रेसको जारी केन्द्रीय कार्यसमितिको बैठकमा उपसभापति  विमलेन्द्र निधिले राजनीतिक प्रस्ताव पेश गरेका छन् । 

पार्टीको केन्द्रीय कार्यसमितिको तर्फबाट गत महासमितिको बैठकमा प्रस्तुत राजनीतिक प्रस्ताव परिमार्जनसहित आजको बैठकमा पेश गरिएको पार्टी मुख्य सचिव कृष्णप्रसाद पौडेलले जानकारी दिए । 

यस्तै बैठकमा भ्रातृ संस्था नेपाल आदिवासी जनजाति संघ र शुभेच्छुक संस्था प्रजातान्त्रिक वन प्राविधिक संघ–नेपालद्वारा स्वीकृतिका लागि पठाइएको विधान छलफलका लागि बैठकमा पेश भएको छ । 
आजको बैठकमा केन्द्रीय सदस्यहरु— बालकृष्ण खाण, रमेश रिजाल, महेन्द्र यादव, गोविन्द भट्टराई, श्यामकुमार घिमिरे, बहादुर सिंह लामा , लक्ष्मी परियार, अमृत अर्याल र अतहर कमाल मुसलमानले आ–आफ्नो धारणा राखेका थिए । 
यसैबीच नेपाल विद्यार्थी संघको केन्द्रीय तदर्थ समिति पार्टी सभापति  शेरबहादुर देउवाले आवश्यक परामर्श गरेपछि गठन गरिने भएको छ । 

केन्द्रीय कार्यसमितिको अर्को बैठक २०७५ फाल्गुण ९ गतेका लागि तय भएको छ ।