३० असार २०८३, मंगलबार
एजेन्सी- ९० को दशककी बोल्ड अभिनेत्री पूजा भट्ट ४७ वर्षकी भइन् । उनको आज जन्मदिन हो । पूजा फिल्म निर्माता महेश र किरण भट्टको छोरी हुन् ।
‘दिल है कि मानता नहीं’ र ‘सडक’जस्ता सुपरहिट फिल्म दिएकी पूजाले अहिले फिल्म निर्देशन पनि गर्छिन् । एक समय पूजाको फिल्मी र व्यक्तिगत जिन्दगीबारे अखबारमा खबर बनिहरेका हुन्थे । तर अहिले उनको त्यतिसारो चर्चा भने हुँदैन ।
पूजाले सन् १९९० मा ‘ड्याडी’ फिल्मबाट अभिनययात्रा थालनी गरेकी थिइन् । त्यसबेला उनी मात्र १६ वर्षकी थिइन् । उक्त फिल्मबाट उनले ‘फिल्म फेयर न्यू फेस अफ दि इयर’ हात पारेकी थिइन् । त्यसपछि उनले महेश भट्टको निर्देशनमा बनेको फिल्म ‘दिल है कि मानता नहीं’मा अभिनेत्रीको रुपमा काम गरिन् । यस फिल्ममा उनको अपोजिटमा आमिर खान थिए । उनले बक्स अफिसमा तमन्ना, चाहत, बोर्डर, जख्मलगायतका हिट फिल्म दिएकी छन् ।
मदिराको लत
पूजा त्यतिबेला चर्चामा आइन्, जब उनले सार्वजनिक रुपमै आफू जँड्याही भएको खुलासा गरिन् । त्यसबेला उनी मात्र १६ वर्षकी थिइन् । पूजाले २३ वर्षको उमेरमा चुरोट पनि पिउन थालिन् । उनले परिवारको माहौल निकै नै खुला भएकाले आफूमा मदिरा तथा धूमपानको लत लागेको बताएकी थिइन् ।
छोरीको मदिराको लतबाट चिन्तित थिए पिता महेश
बताइएअनुसार छोरी पूजाको मदिराको लतका कारण पिता महेश भट्ट निकै चिन्तित थिए । यसको खुलासा पूजा आफैंले गरेकी थिइन् । उनलाई त्यतिबेला पिताले फोनमा भनेका थिए, ‘यदि तिमी मलाई माया गर्छौं भने तिमी आफूलाई पनि माया गर । किनकी म तिमीभित्रै बस्न चाहन्छु ।’ त्यसपछि आफूले मदिरा छोडेको पूजाले बताएकी थिइन् ।
फोटोशूटले मच्चाएको थियो बबाल
पूजा आफ्नो बोल्डनेसका कारण निकै चर्चा र विवादमा रहने गर्थिन् । एक म्यागेजिनको कभरका लागि उनले पिता महेशसँग फोटोशूट गराएकी थिइन् । मानिसहरूले बाबु-छोरीको फोटो मन पराएनन् । र उनीहरूले चर्को आलोचना सहनुपर्यो ।
