०५ असार २०८३, शुक्रबार
काठमाडौं - राजधानीको धूलो नियन्त्रणका लागि काठमाडौं महानगरपालिकाले खरिद गरेका ५ वटा ब्रूमर भारतस्थित कोलकाता बन्दरगाहमा आइपुगेका छन् ।
ब्रूमर खरिदका लागि गत वर्षको फागुन महिनामा प्रक्रिया शुरू भएको थियो । त्यसको एक वर्षपछि ब्रूमर खरिद गरी नेपाल ल्याउन लागिएको हो ।
१० करोड ८४ लाख ५० हजार रुपैयाँमा ब्रुमर खरिद गरी कोलकातासम्म ल्याइएको महानगरका प्रवक्ता ईश्वरमान डंगोलले बताए । महानगरले भन्सार छूटका लागि अर्थमन्त्रालयमा प्रस्ताव समेत पठाएको छ ।
अबको एक महिनाभित्र ती ब्रुमर काठमाडौं आइपुग्ने उनले बताए ।
थन्किए दुई ब्रूमर
चीनको एक नगरपालिकाले अनुदानमा उपलब्ध गराएको दुईवटा ब्रूमर प्राविधिक जटिलताका कारण थन्किएका छन् । बाँयातर्फ चालक इञ्जिन रहने ती ब्रूमर चलाउन नसकिएको प्रवक्ता डंगोलले बताए ।
सडक विभागसँगको समन्वयमा चलाइएका ब्रूमर पनि त्यति प्रभावकारी नभएको उनले बताए ।
उनले भने- महानगरपालिकासँग आफ्नै ब्रूमर छैन । सडक विभागसँग समन्वय गरेर बानेश्वर, एयरपोर्ट, माइतीघर लगायतका क्षेत्रमा ब्रूमर लगाइएपनि त्यो काम त्यति प्रभावकारी भएको छैन ।'
नयाँ ब्रूमर आइसकेपछि धूलोको समस्या समाधान हुने उनको जिकिर छ ।
