०२ असार २०८३, मंगलबार
काठमाडौं –५१ जनाको ज्यान जानेगरी यूएस बंगला एयरको विमान दुर्घटना भएको आज एकवर्ष पूरा भएको छ । २०७४ फागुन २८ गते सोमवार दिउँसोको १ बजेर ५७ मिनेटको समयमा विमान दुर्घटनामा परेको थियो । डीएच ८ डी (फ्लाइट नम्बर बीएस २११) त्रिभुवन अन्तर्राष्ट्रिय विमानस्थलको हवाइमार्गमा दुर्घटनमा परेको थियो ।
६७ यात्रु र चालकदलका ४ सदस्यसहित ७१ जना बोकेर ढाकाबाट काठमाडौं उडेको यूएस बंगलाको विमान दुर्घटनामा ५१ जनाको मृत्यु भएको थियो । दुर्घटनामा २२ जना नेपाली २८ जना बंगलादेशी र १ चिनियाँ नागरिकको मृत्यु भएको थियो । २० जना घाइते भएका थिए ।
नेपालको हवाइ इतिहासमा त्यो ८५औं दुर्घटना थियो । त्रिभुवन अन्तर्राष्ट्रिय विमानस्थलभित्र भएको पहिलो ठूलो दुर्घटना पनि थियो । दुर्घटनाको जाँचबुझ गर्न सरकारले पूर्वसचिव यज्ञप्रसाद गौतमको संयोजकत्वमा समिति गठन गरेको थियो । समितिले गएको भदौ २० गते तत्कालीन संस्कृति, पर्यटन तथा नागरिक उड्डयनमन्त्री स्व. रवीन्द्र अधिकारीलाई प्रतिवेदन बुझाएको थियो ।
प्रतिवेदनमा यूएस बंगला एयरलाइन्स दुर्घटना मुख्य कारण पाइलटको कमजोरी देखाइएको छ । पाइलटले सामान्य संयमता अपनाउन नसक्दा उक्त दुर्घटना हुन पुगेको समितिले ठहर गरेको छ । पाइलटले अवतरणका क्रममा रनवेको एलाइन छाडेको र तत्कालीन अवस्थामा सावधानी नपअपनाउँदा दुर्घटना भएको प्रतिवेदनमा औंल्याइएको छ ।
