२८ जेठ २०८३, बिहीबार
पर्वत- पर्वत र बागलुङ जिल्लाका विभिन्न स्थानमा सोमबार दिउँसो आएको असिनापानीले बालीनालीमा ठूलो क्षति पुर्याएको छ । पर्वतको फलेवास नगरपालिका, विहादी गाउँपालिका र बागलुङको जैमिनी नगरपालिकामा असिनापानीले बालीनाली र फलफूल खेतीमा ठुलो क्षति पुर्याएको हो ।
करीब एक घण्टा परेको असिनाले बालीनालीसँगै फूल खेल्दै गरेको सुन्तलाबाली, भित्र्याउने तयारीमा रहेको गहुँ, तोरीलगायतका बाली पूर्णरूपमा झारेर नष्ट गरेको नगरपालिका–८ छिस्तीका गोविन्द पौडेलले जानकारी दिनुभयो । नगरपालिका–७ को जैदीमा पनि असिनापानीले क्षति पुर्याएको पौडेलले बताउनुभयो ।
फलेवास नगरपालिकाको वडा नं ५, ६, ७, ९, १०, ११, विहादी गाउँपालिका वडा नं १ मा पनि असिनापानीले बालीनालीमा क्षति भएको छ । फलेवास नगरपालिका वडा नं ९ भङ्गाराका अर्जुन क्षेत्रीले हिउँदेबाली सबै असिनाले सखाप पारेको बताउनुभयो ।
पर्वतका एक दर्जन स्थानमा असिनापानीले बालीनालीमा ठूलो नोक्सानी पुर्याएको तर क्षतिको यकिन विवरण भने सङ्कलन गर्ने काम भइरहेको कृषि ज्ञान केन्द्र पर्वतका प्रमुख वासुदेव रेग्मीले जानकारी दिनुभयो । पर्वत र बागलुङ जिल्ला हेर्दै आएको केन्द्रले दुवै जिल्लामा क्षतिको विवरण सङ्कलनका लागि प्राविधिक परिचालन गरिएको उहाँले बताउनुभयो ।
