२३ जेठ २०८३, शनिबार
काठमाडौं– चारपटकसम्म प्रधानमन्त्री भइसकेका काँग्रेस सभापति शेरबहादुर देउवाले कुटनीतिक प्राटोकल ख्याल नगरी भारतीय विदेशमन्त्री एस जयशंकरलाई शुभकामना सन्देश पठाएको भन्दै पार्टीभित्र आलोचना गरेको छ ।
आजको कान्तिपुर दैनिक लेख्छ-भारतीय प्रधानमन्त्री नरेन्द्र मोदीलाई शुभकामना पठाएको भोलिपल्टै देउवाले शनिबार पार्टीका तर्फबाट विदेशमन्त्री जयशंकरलाई बधाई तथा शुभकामना पठाएका थिए । उनको शुभकामना सन्देशलाई पार्टीका शीर्ष नेतादेखि परराष्ट्रविद्ले समेत रुचाएका छैनन् । उनीहरूले भारतलाई रिझाउने नाममा सभापतिबाटै भएको यस्तो कदमलाई अशोभनीय भनेका छन् ।
भारतको मन्त्रिपरिषद्मा विदेशमन्त्री जयशंकरको मर्यादा ११ औं स्थानमा छ । पहिलो नम्बरमा रक्षामन्त्री राजनाथ सिंह छन् । उनी भारतीय जनता पार्टीका पूर्वअध्यक्ष हुन् । दोस्रो नम्बरमा भाजपा अध्यक्ष अमित शाह छन् । उनी गृहमन्त्री छन् । ‘प्रोटोकलअनुसार आफ्नो काउन्टर पार्टनरलाई मात्रै शुभकामना दिनुपर्ने चलन हो । त्यस हिसाबले देउवाजीले अमित शाहलाई शुभकामना पठाउँदा शोभनीय हुन्थ्यो,’ एक परराष्ट्रविद्ले भने, ‘एउटा पुरानो र ऐतिहासिक पार्टीको सभापति, त्यसमा पनि चारपटकसम्म प्रधानमन्त्री भइसकेका व्यक्तिले ११ औं नम्बरमा रहेका मन्त्रीलाई शुभकामना सन्देश पठाउँदा नेपाली जनमानसमा कस्तो सन्देश जाला ?’
