काठमाडौं – राष्ट्रिय गौरवको आयोजनाका रुपमा निर्माण भइरहेको पेट्रोलियम पाइपलाइनमा ठेकेदार कम्पनीले डोजर लगाएको छ ।

भारतको रक्सौलदेखि नेपालको अमलेखगञ्जसम्म निर्माण भइरहेको र काम समेत अन्तिम चरणमा पुगेका बेला पाइपलाइनमा ठेकेदारले डोजर लगाएको हो ।

वीरगन्ज–पथलैया व्यापारिक सडक सुधार आयोजनाका ठेकेदारले पाइपलाइनमा डोजर लाएर पाइपलाइन काटिदिएको नेपाल आयल निगमले जनाएको छ । निगमका कार्यकारी निर्देशक सुरेन्द्र पौडेलले ठेकेदारले डोजर लगाउँदा पाइप काटिएको बताए ।

‘पाइपलाइन निर्माण भइरहेको सिमराको परवानीपुर खण्डमा ठेकेदारले डोजर लाउँदा पाइप काटिएको जानकारी आएको छ,’ उनले भने, ‘पाइपलाइनमा पेट्रोल आयात गर्दा त्यसको जानकारी राख्नका लागि पाइपलाइनसँगै बिछ्याउन लागेको अप्टिकल फाइभर पनि काटिएको छ ।’

पेट्रोलियम पदार्थ आयात गर्दा त्यसको सम्पूर्ण जानकारी राख्नका लागि इन्टरनेट जडान गरिन लागेको र त्यसका लागि बिछ्याउन लागेको अप्टिकल फाइभर करीब ७ मिटर डोजरले काटेको पौडेलले बताए ।

परवानीपुर आँखा अस्पताल नजिकै पाइपलाइन काटिएको थाहा पाएपछि त्यसको सत्यतथ्य बुझ्नका लागि निगमको केन्द्रिय कार्यालयबाट कर्मचारी त्यता पठाइएको समेत पौडेलले बताए । वीरगञ्ज–पथलैया व्यापारिक सडक सुधार आयोजनाको काम सपना निर्माण सेवा कम्पनीले गरिरहेको छ । 

पाइपलाइन सञ्चालन गर्ने सीमा धकेलियो

निगमले आगामी जुन ३० तारिखमा पाइपलाइनको परीक्षण गर्ने योजना बनाएको पौडेलले बताए । तर पाइपलाइनमा डोजर लागेर पाइप काटिएपछि परीक्षणको समयमा समेत धक्का पुगेको पौडेलको भनाई छ । पाइपलाइनमा पुगेको यकिन क्षतिबारे स्पष्ट हुन नपाउँदै निगमका कर्मचारीले आयोजना धकेलिने प्रचारमा बढी जोड दिइरहेका छन् । 

पाइपलाइनमा लागेको डोजरको सम्बन्धमा त्यहाँ प्रमुख जिल्ला अधिकारी सहितको सहभागितमा छलफल गरिने निगम प्रमुख पौडेलले बताए । पौडेलका अनुसार डोजर लागेर पाइपलाइनमा पुगेको क्षति कसले व्यहोर्ने भन्ने कुरा छलफलपछि मात्रै टुंगो लाग्नेछ ।

रक्सौलदेखि अमलेखगञ्जसम्म भारत र नेपालको संयुक्त लगानीमा पेट्रालियम पाइपलाइन निर्माण भइरहेको थियो । करीब ४ अर्ब रुपैयाँ लागत लाग्ने भनिएको पाइपलाइनको ७५ प्रतिशत भारत र २५ प्रतिशत नेपालले व्यहोर्ने दुवै पक्षबीच सहमति भएको थियो । सरकारले २०७३ सालदेखि राष्ट्रिय गौरवको आयोजनामा पेट्रोलियम पाइपलाइनको काम अघि बढाएको थियो ।