काठमाडौं– यातायात व्यवस्था विभागले सार्वजनिक सार्वजनिक यातायातको भाडावृद्धि गर्ने निर्णय फिर्ता लिएको छ ।

 विभागले बिहीबार दिउँसो सार्वजनिक यातायातको भाडा १२ प्रतिशतसम्म वृद्धि गर्ने निर्णय गरेको थियो । 

तर, यससम्बन्धमा थप अध्ययन गरी ठोस निष्कर्षमा पुग्नुपर्ने आवश्यकता महसुश भएको भन्दै अर्को सूचना प्रकाशित नहुन्जेलसम्मको लागि भाडा वृद्धि कार्यान्वयन नहुने विभागले बिहीबार साँझ जारी गरेको विज्ञप्तिमा उल्लेख छ । 
विभागका प्रवक्ता तीर्थराज खनालले जारी गरेको विज्ञप्तिमा असार १ देखि लागू हुने भनिएको नयाँ भाडादर लागू नहुने उल्लेख गरिएको छ । 

 काठमाडौं उपत्यकामा रात्रीकालीन सार्वजनिक यात्रुबाहक बस सञ्चालन गर्नेबारे र रिङरोड भित्र तथा भक्तपुर र कीर्तिपुर क्षेत्रमा मालबाहक ढुवानीका साधनलाई सञ्चालनमा रोक लगाउने सम्बन्धी सूचना पनि तत्काल कार्यान्वयन नहुने विज्ञप्तिमा उल्लेख गरिएको छ । 

भाडा बढाएको भन्दै विद्यार्थी संगठन र सामाजिक सञ्चालमा तीब्र आलोचना सुरु भएपछि चलाखीपूर्ण तबरले निर्णय फिर्ता लिएको बुझिएको छ ।