२४ जेठ २०८३, आइतबार
काठमाडौं– प्रधानमन्त्री केपी शर्मा आोलीले चौतर्फी विरोध भइरहेको गुठी विधेयक सच्चाउन सकिने संकेत गरेका छन् ।
साताव्यापी युरोप भ्रमण सकेर आइतवार स्वदेश फर्केपछि त्रिभुवन अन्तर्राष्ट्रिय विमानस्थलमा पत्रकारहरूसँग कुरा गर्दै प्रधानमन्त्री ओलीले धर्म संस्कृतिमा जानी-नजानी कमजोरी भएको भए सरकार विधेयक सच्चाउन तयार रहेको बताएका हुन् ।
सरकार नेपालको मौलिक कला सांस्कृतिको संरक्षणमा गम्भीर रहेको उनले बताए । ‘म आइसकेको छु, सबै कुरा हेरिने छ । रीतिरिवाज र धर्म संस्कृतिका कुरामा जानी-नजानी कमजोरी भएको रहेछ भने सच्याउन तयार हुनेछौं,’ ओलीले भने ।
राष्ट्रियसभामा विचाराधीन गुठी विधेयकको विरोधमा काठमाडौं उपत्यकाका विभिन्न समुदाय र गुठीले आन्दोलन गरिरहेका छन् । ओलीले विधेयकले संस्कृतिमा केही धक्का पुगेको भए सुधार गर्न सरकार तयार रहेको पनि बताए ।
‘यो जनताको सरकार हो र उनीहरूकै इच्छा र चाहनाअनुसार काम हुन्छ,’ ओलीले भने, ‘जनतालाई हामी भगवान मान्छौं, कुनै पनि काम शतप्रतिशत हुँदैन, सुधार गर्नुपर्ने भए सरकार त्यसका लागि तयार छ ।’
