०४ साउन २०८३, सोमबार
काठमाडौं – ट्युनिसियाको राजधानी ट्युनिसमा दुईवटा आत्मघाती आक्रमण भएको केही समयपछि देशका ९२ वर्षीय राष्ट्रपतिलाई गम्भीर स्वास्थ्य संकट देखिएपछि सैन्य अस्पताल लगिएको छ ।
राष्ट्रपति बेजी कैद एस्सेब्सी गम्भीर बिरामी भएको र उनलाई सैन्य अस्पताल लगिएको राष्ट्रपति कार्यालयले फेसबूकमा पोस्ट गरेर जानकारी दियो ।
त्यसअघि ट्युनिसमा सुरक्षा बलहरूलाई लक्षित गरी दुईवटा आत्मघाती आक्रमण भएका थिए । त्यसमा परी कम्तीमा एकजनाको मृत्यु भएको छ भने अन्य कैयौं घाइते भएका छन् ।
विस्फोटमा परी घाइते भएका सबैजनाको स्वास्थ्य स्थिर रहेको चार्ल्स निकोल अस्पतालका निर्देशकले बताए ।
आईएसले आक्रमणको जिम्मेवारी लिए पनि कुनै प्रमाण प्रस्तुत गरेन । उसले आफ्नो मिडिया संस्था अमाक न्युज एजेन्सीमार्फत यो जानकारी दिएको थियो ।
पहिलो विस्फोट ट्युनिसको मध्यभागमा भएको थियो । आक्रमणकारीले शहरको मुख्य चौबाटोमा प्रहरी गश्तीलाई तारो बनाएको थियो ।
विस्फोटमा एक प्रहरी मारिए अनि तीन सर्वसाधारण र अनेकौं सुरक्षाकर्मी घाइते भए ।
त्यसको दश मिनेटपछि शहरको एक प्रहरी चौकीमा दोस्रो बम विस्फोट भयो ।
उक्त विस्फोटमा परी कम्तीमा चार सुरक्षाकर्मी घाइते भएको र तीमध्ये दुईजनाको स्थिति गम्भीर रहेको गृह मन्त्रालयका प्रवक्ता सोफिएन जाकले बताए ।
सीएनएनबाट
