०४ असार २०८३, बिहीबार
काठमाडौं – अमेरिकाको ओहायोमा ७९ वर्षीया वृद्धालाई भुस्याहा बिरालोहरूलाई खाना खुवाएको आरोपमा १० दिनको कारावास सजाय दिइएको छ ।
सन् २०१५ देखि न्यान्सी सेगुलाका छिमेकीहरूले भुस्याहा बिरालोहरूका बारेमा अधिकारीहरूसमक्ष गुनासो गरिरहेका थिए । पहिले त्यहाँ बस्ने एक व्यक्तिले बिरालोहरू छोडेर गएको सेगुलाको दाबी छ ।
‘म बिरालोप्रेमी हुँ,’ उनले क्लिभल्यान्डमा फक्स ८ लाई बताइन् ।
न्यायाधीशले उनको सजाय साउन २६ गतेबाट शुरू हुने आदेश दिएका छन् । कुयाहोगा काउन्टी कारागारमा उनले कारावास सजाय भोग्नुपर्ने भएको छ ।
उनको घरमा बिरालै बिरालो भएपछि छिमेकीकहरूले प्रहरीसमक्ष अनेकौंचोटि उजुरी गरेका थिए ।
प्रहरीका अनुसार, सेगुलाको कानूनी मुद्दा सन् २०१५ मा शुरू भएको हो । उनका छिमेकीहरूले स्थानीय जनावर वार्डेनलाई सम्पर्क गरेका थिए ।
जुलाई २०१५ मा उनलाई भुस्याहा जनावरलाई खाना खुवाएर शहरको कानून उल्लंघन गरेकोमा दोषी ठहर गरिएको थियो ।
मे २०१७ मा उनीमाथि आफ्नो निवासमा बिरालोलाई खाना खुवाएको विभिन्न आरोप लागेको थियो ।
त्यसै वर्षको जुलाई महिनामा उनको घरमा धेरै बिरालो भएकोमा दोषी ठहर गरी प्रोबेसनमा राखिएको थियो ।
त्यसको एक महिनापछि उनलाई जनावरको मल सफा नगरेको आरोपमा नोटिसमा लिइएको थियो ।
उनलाई अदालतले भुस्याहा बिरालो नखुवाउन आदेश दिएको थियो ।
गत साता भएको सुनुवाइमा उनले बिरालोहरूलाई अझै पनि खुवाइरहेको स्वीकार गरेपछि अदालतको अवहेलना गरेको आरोपमा १० दिनको कारावास सजाय दिइएको हो ।
सेगुलालाई कारावास सजाय दिइएपछि प्रहरीको चर्को आलोचना भयो अनि प्रहरीले फेसबूकमा पोस्ट गरेर लेख्यो, ‘सेगुलालाई प्रहरी विभाग वा एनिमल वार्डेनले कहिले पनि पक्राउ गरेको छैन ।’
बीबीसीबाट
